អង់គ្លេស៖ ចក្រភពអង់គ្លេស បានព្រមានកាលពីថ្ងៃអង្គារ ទី២៥ ខែកក្កដាថា ខ្លួនមានព័ត៌មានដែលបង្ហាញថា យោធារុស្ស៊ីអាចចាប់ផ្តើមកំណត់គោលដៅដឹកជញ្ជូនជនស៊ីវិល នៅក្នុងសមុទ្រខ្មៅ ខណៈដែលសហភាពអឺរ៉ុប បានសន្យាជួយអ៊ុយក្រែននាំចេញកសិផលស្ទើរតែទាំងអស់របស់ខ្លួនតាមរយៈផ្លូវដែក និងផ្លូវគោក។

តម្លៃស្រូវសាលីសកល បានកើនឡើង ១៥ភាគរយក្នុងសប្តាហ៍មុន បន្ទាប់ពីប្រទេសរុស្ស៊ី បានចាកចេញពីកិច្ចព្រមព្រៀងដែលអនុញ្ញាតឲ្យការនាំចេញធញ្ញជាតិនៅសមុទ្រខ្មៅប្រកបដោយសុវត្ថិភាពសម្រាប់រយៈពេលមួយឆ្នាំ ហើយបានចាប់ផ្តើមកំណត់គោលដៅកំពង់ផែអ៊ុយក្រែន និងហេដ្ឋារចនាសម្ព័ន្ធគ្រាប់ធញ្ញជាតិនៅលើសមុទ្រខ្មៅ និងទន្លេដានូប៊ី (Danube) ។

លោកស្រី បាបារ៉ា វ៉ូវ៉ាដ ( Barbara Woodward) ឯកអគ្គរដ្ឋទូតអង្គគ្លេសប្រចាំនៅអង្គការសហប្រជាជាតិ បាននិយាយកាលពីថ្ងៃអង្គារថា៖«ព័ត៌មានរបស់យើងបង្ហាញថា យោធារុស្ស៊ីអាចពង្រីកគោលដៅរបស់ពួកគេទៅលើរោងចក្រគ្រាប់ធញ្ញជាតិរបស់អ៊ុយក្រែនបន្ថែមទៀត ដើម្បីរួមបញ្ចូលការវាយប្រហារប្រឆាំងនឹងការដឹកជញ្ជូនជនស៊ីវិល នៅក្នុងសមុទ្រខ្មៅ»។

លោកស្រីវ៉ូវ៉ាដ បានថ្លែងប្រាប់អ្នកសារព័ត៌មានថា លោកនាយករដ្ឋមន្រ្តីអង់គ្លេស រីស៊ី ស៊ុណាក់ (Rishi Sunak) បានចែករំលែកព័ត៌មានជាមួយប្រធានាធិបតីអ៊ុយក្រែន លោក វ៉ូឡូមៀរ ហ្សេឡិនស្គី(Volodymyr Zelenskyy) ក្នុងអំឡុងពេលការហៅទូរស័ព្ទកាលពីថ្ងៃអង្គារ លោក Woodward បានប្រាប់អ្នកយកព័ត៌មាន។ លោស្រីបានបន្ថែមថា ប្រទេសអង់គ្លេសក៏មានព័ត៌មានថា រុស្ស៊ីបានដាក់មីនសមុទ្របន្ថែម នៅតាមក្នុងការចូលទៅជិតកំពង់ផែនានារបស់អ៊ុយក្រែន៕