ភ្នំពេញ៖ សាលារាជធានីភ្នំពេញ បានសម្រេចដកចេញ«តំបន់ក្រហម»ពីផែនទីភូមិសាស្ត្ររាជធានីភ្នំពេញហើយនៅថ្ងៃនេះ ដោយភូមិសាស្ត្រមួយនេះ ត្រូវបានកែសម្រួលមកនៅត្រឹម«តំបន់លឿងទុំ» និង«តំបន់លឿង»វិញ។
ក្នុងសេចក្ដីសម្រេចចេញនៅថ្ងៃនេះ សាលារាជធានីភ្នំពេញ បានបែងចែកភូមិសាស្ត្ររាជធានីភ្នំពេញជា ២តំបន់ គឺ«តំបន់លឿងទុំ» ដែលសំដៅដល់ភូមិសាស្ត្រមានការឆ្លងរាលដាលកម្រិតមធ្យមនៃមេរោគកូវីដ-១៩ និង«តំបន់លឿង» ដែលសំដៅដល់ភូមិសាស្ត្រមានការឆ្លងរីករាលដាលកម្រិតស្រាលនៃមេរោគកូវីដ-១៩នេះ។
បើតាមសេចក្ដីសម្រេចនេះ ភូមិសាស្ត្រដែលស្ថិតនៅក្នុង«តំបន់លឿងទុំ» មានផ្នែកខ្លះនៃភូមិដើមចាន ស្ថិតក្នុងខណ្ឌច្បារអំពៅ ភូមិ២៣ ស្ថិតក្នុងសង្កាត់បឹងកក់ទី២ នៃខណ្ឌទួលគោក ភូមិត្រពាំងថ្លឹង១ ភូមិត្រពាំងថ្លឹង២ ភូមិត្រពាំងថ្លឹង៤ និងភូមិទួលពង្រ ស្ថិតក្នុងខណ្ឌពោធិ៍សែនជ័យ។
នៅក្នុងខណ្ឌឫស្សីកែវឯណោះវិញ សាលារាជធានីភ្នំពេញ បានកំណត់ផ្នែកខ្លះនៃភូមិចុងខ្សាច់ និងផ្នែកខ្លះទៀតនៃភូមិបាក់ទូក ស្ថិតក្នុងសង្កាត់ទួលសង្កែទី១ ឱ្យមកនៅត្រឹម«តំបន់លឿងទុំ»ផងដែរ។
សម្រាប់ខណ្ឌមានជ័យ ដែលធ្លាប់ជា«តំបន់ក្រហម» ឬផ្ទុះការឆ្លងច្រើននោះ ក៏លែងជា«តំបន់ក្រហម»ទៀតហើយដែរ ដោយចុះមកនៅត្រឹម«តំបន់លឿងទុំ» ដូចជាផ្នែកខ្លះនៃភូមិ៥ ស្ថិតក្នុងសង្កាត់ស្ទឹងមានជ័យទី២ ផ្នែកខ្លះទៀតនៃភូមិដំណាក់ធំ២ ផ្នែកខ្លះទៀតនៃភូមិដំណាក់ធំ៣ និងផ្នែកខ្លះទៀតនៃភូមិទ្រា៤ ស្ថិតក្នុងសង្កាត់ស្ទឹងមានជ័យទី៣។
រដ្ឋបាលរាជធានីភ្នំពេញ បានបញ្ជាក់ក្នុងសេចក្ដីសម្រេចថា «តំបន់លឿងទុំ» បន្តស្ថិតក្រោមវិធានការបិទខ្ទប់រយៈពេល ១សប្ដាហ៍ទៀត ចាប់ពីថ្ងៃស្អែកនេះ រហូតដល់ថ្ងៃទី២៦ ខែឧសភា។
ក្រៅពីភូមិសាស្ត្រដែលត្រូវបានចាត់ចូលក្នុង«តំបន់លឿងទុំ»ខាងលើ ភូមិសាស្ត្រដទៃទៀតនៃរាជធានីភ្នំពេញ ត្រូវបានកែសម្រួលទៅជា«តំបន់លឿង»។
សម្រាប់«តំបន់លឿង»នេះ អាជ្ញាធររាជធានីភ្នំពេញ សម្រេចដាក់ចេញវិធានការរដ្ឋបាលរយៈពេល ២សប្ដាហ៍ទៀត ចាប់ពីថ្ងៃស្អែកនេះរហូតដល់ថ្ងៃទី០២ ខែមិថុនាខាងមុខនេះ។
ភូមិសាស្ត្ររាជធានីភ្នំពេញ ត្រូវបានកែសម្រួលជាបន្តបន្ទាប់ បន្ទាប់ពីបានមើលឃើញការធ្លាក់ចុះចំនួនករណីឆ្លងមេរោគកូវីដ-១៩នៅក្នុងរយៈពេល ២សប្ដាហ៍ចុងក្រោយមកនេះ៕ អត្ថបទ៖ សុធី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
