អាកាសធាតុដ៏ក្តៅបំផុត និងគ្រោះរាំងស្ងួតនៅរដ្ឋ Arizona សហរដ្ឋអាមេរិក បានធ្វើឲ្យប៉ះពាល់យ៉ាងខ្លាំងដល់ដើមដំបងយក្សវាលខ្សាច់ ដូចដើមដំបងយក្សសាក្វារ៉ូនិមិត្តរូបប្រចាំរដ្ឋ ។ 

លោកស្រីវេជ្ជបណ្ឌិត Tania Hernandez ដែលជាអ្នកវិទ្យាសាស្រ្តស្រាវជ្រាវ និយាយនៅក្នុងបទសម្ភាសន៍ជាមួយទីភ្នាក់ងារព័ត៌មានរ៉យទ័រថា រុក្ខជាតិប្រភេទនេះ បង្ហាញសញ្ញាទុក្ខព្រួយ ដូចជាបាត់បង់ដៃរបស់វា បាក់ធ្លាក់ចុះ ទ្រេត និងផ្លាស់ប្តូររូបរាងរបស់ពួកវា។ 

 លោកស្រីនិយាយថា ក្រុមអ្នកស្រាវជ្រាវនៅពុំទាន់ដឹងច្បាស់នោះទេថាតើវាពាក់ព័ន្ធនឹងអាកាសធាតុក្តៅខ្លាំង និងគ្រោះរាំងស្ងួតបណ្តាលមកពីបម្រែបម្រួលអាកាសធាតុឬយ៉ាងណានោះទេ ប៉ុន្តែពួកគេសង្ស័យថា វាប្រហែលបណ្តាលមកពីករណីទាំងនេះ។ 

លោកស្រី Hernandez បន្តថា រុក្ខជាតិវាលខ្សាច់ ពួកវាចេះសម្របខ្លួនតាមរលកកម្តៅ និងគ្រោះរាំងស្ងួត ហើយវាអាចរស់រានបានក្នុងស្ថានភាពអាកាសធាតុហួតហែងខ្លាំង ប៉ុន្តែអាចរស់បានរហូតដល់វាត្រូវការទឹក។ តាមធម្មតា រដ្ឋ Arizonaទទួលបានភ្លៀងមូសុងនៅក្នុងរដូវក្តៅ។ 

លោកស្រី Hernandez និយាយទៀតថា ក្រុមអ្នកស្រាវជ្រាវនៅសួនរុក្ខសាស្រ្តវាលខ្សាច់ Desert Botanical Gardenកំពុងចាប់ផ្តើមដំណាក់កាលស៊ើបអង្កេតរបស់ពួកគេ។ ពួកគេមានគម្រោងយកសំណាក ដើម្បីពិនិត្យមើលថាតើប្រភេទរុក្ខជាតិដំបងយក្ស ទប់ទល់នឹងកម្តៅក្នុងកម្រិតក្តៅបំផុត ដោយរបៀបណា៕