លោក Joe Lewis ដែលជាមហាសេដ្ឋីអង់គ្លេស និងជាម្ចាស់ក្លិបបាល់ទាត់មាន់ខ្នាយមាស Spurs ត្រូវបានតុលាការចោទប្រកាន់នៅទីក្រុងញូវយ៉ក សម្រាប់រៀបចំគម្រោងលក់ ឬទិញភាគហ៊ុនខុសច្បាប់ ។ 

ក្រុមរដ្ឋអាជ្ញា និយាយថា លោក Lewisបានទាញយកកម្រៃពីការចូលដល់របស់លោកនៅក្នុងសាលប្រជុំគណៈនាយកសាជីវកម្ម ដោយបញ្ជូនព័ត៌មានសម្ងាត់របស់ក្រុមហ៊ុនដែលលោកនិយោគដល់មិត្តភ័ក្រ្ត ជំនួយការផ្ទាល់ អាកាសយានិកឯកជន និងគូស្នេហ៍របស់លោក ដើម្បីឲ្យពួកគេកើបប្រាក់ចំណេញរាប់លានដុល្លារ។ 

លោក Damian Williams ដែលជាមេធាវីសហរដ្ឋអាមេរិក បាននិយាយនៅក្នុងវីដេអូដែលបានបង្ហោះលើបណ្តាញព័ត៌មានសង្គម Xដែលកាលពីមុនគេស្គាល់ថាជាបណ្តាញព័ត៌មានសង្គម Twitter នោះថា រឿងបែបនេះ វាមិនសំខាន់ចាំបាច់ទេ ។ លោក Joe Lewisគឺជាមហាសេដ្ឋី ។ 

លោក Williams បន្តថា ប៉ុន្តែដូចដែលពួកយើងចោទប្រកាន់អញ្ចឹងថា គាត់ប្រើប្រាស់ព័ត៌មានខាងក្នុង ជាមធ្យោបាយដើម្បីផ្តល់សំណងដល់និយោជិករបស់គាត់ ឬផ្តល់អំណោយដល់មិត្តភ័ក្រ្ត និងគូស្នេហ៍របស់គាត់ ។ នោះគឺជាអំពើពុករលួយសាជីវកម្ម វាគឺជាការបោកប្រាស់ ហើយវាប្រឆាំងនឹងច្បាប់ ។ 

លោក Lewis ដែលជាស្ថាបនិកបង្កើតក្រុមហ៊ុនវិនិយោគ Tavistock Groupត្រូវបានគេចោទប្រកាន់ពីបទក្លែងបន្លំមូលបត្រ ១៦ករណី និងបទសមគំនិត ៣ករណី សម្រាប់ឧក្រិដ្ឋកម្មចាប់ពីឆ្នាំ ២០១៣ ដល់ឆ្នាំ២០២១ ។ 

លោក David Zornow ដែលជាមេធាវីរបស់លោក Lewis និយាយនៅក្នុងសេចក្តីថ្លែងការណ៍ផ្ញើតាមអ៊ីម៉ែលថា រដ្ឋាភិបាលសហរដ្ឋអាមេរិក បានបង្កើតកំហុសដ៏ធ្ងន់ធ្ងរមួយក្នុងការវាយតម្លៃលោក Lewis គឺជាបុរសវ័យ ៨៦ឆ្នាំម្នាក់ដែលមានភាពស្មោះត្រង់ និងសម្រេចសមិទ្ធិផលដ៏អស្ចារ្យ៕