ក្រសួងការបរទេសរបស់ប្រទេសម៉ុលដូវ៉ា កាលពីថ្ងៃអង្គារ (ទី២៥ ខែកក្កដា) បានឲ្យដឹងថា ខ្លួននឹងកោះហៅឯកអគ្គរដ្ឋទូតរុស្ស៊ី លោក Oleg Vasnetsov ដើម្បីឲ្យមានការពន្យល់អំពីសេចក្ដីរាយការណ៍របស់ប្រព័ន្ធផ្សព្វផ្សាយ ដែលថា មានការដំឡើងឧបករណ៍នៅលើដំបូលស្ថានទូតរុស្ស៊ី ដែលអាចប្រើសម្រាប់កិច្ចការចារកម្ម។

បណ្ដាញសារព័ត៌មាន Insider និងប៉ុស្តិ៍ទូរទស្សន៍ Jurnal TV បាននិយាយថា ចានផ្កាយរណបចំនួន ២៨ សសរបង្គោល និងឧបករណ៍បញ្ជូន និងទទួល ត្រូវបានដំឡើងនៅពីលើស្ថានទូត និងអគារលំនៅឋានជិតខាង ដែលប្រើប្រាស់ដោយអ្នកការទូត និងបុគ្គលិកបច្ចេកទេស។ 

នៅក្នុងសេចក្ដីរាយការណ៍រួមមួយ ក្រសួងការបរទេស បានឲ្យដឹងថា មនុស្សដែលមានទំនាក់ទំនងជាមួយចារកម្មរុស្ស៊ី ត្រូវបានគេឃើញវត្តមាន នៅលើអគារទាំងនោះ។ ក្រសួងការបានលើកឡើងថា៖ «យើងចាត់ទុកចារកម្ម ឬការជ្រៀតជ្រែកពីបរទេស ក្នុងកិច្ចការផ្ទៃក្នុងរបស់ប្រទេសម៉ុលដូវ៉ា គឺជារឿងមិនអាចទទួលយកបានជាដាច់ខាត ព្រោះនេះគឺតំណាងឲ្យការប្រឈមដោយផ្ទាល់ចំពោះអធិបតេយ្យភាព និងសន្តិសុខជាតិនៃរដ្ឋម៉ុលដូវ៉ា»។

ស្ថានទូតរុស្សី និងទីក្រុងម៉ូស្គូ មិនបានធ្វើការអត្ថាធិប្បាយអ្វីភ្លាមៗនោះឡើយ ចំពោះសេចក្តីថ្លែងការណ៍របស់ក្រសួង ឬចំពោះរបាយការណ៍ប្រព័ន្ធផ្សព្វផ្សាយ។ ប្រទេសរុស្ស៊ីបានបដិសេធការលើកឡើងរបស់ប្រទេសម៉ុលដូវ៉ាម្តងហើយម្តងទៀត ដែលចោទពីការជ្រៀតជ្រែកក្នុងកិច្ចការរបស់ប្រទេសនេះ ជាពិសេសជុំវិញតំបន់ផ្តាច់ខ្លួនត្រង់ស៊្នីសទ្រី (Transdniestria) ជាទីដែលទីក្រុងម៉ូស្គូ មានដាក់ពង្រាយកងកម្លាំងរក្សាសន្តិភាពរបស់ខ្លួន។

ភាពតានតឹង ក៏បានកើនឡើងផងដែរ ជុំវិញការលុកលុយរបស់រុស្ស៊ីមកលើប្រទេសអ៊ុយក្រែន។ ប្រទេសម៉ុលដូវ៉ា ដែលមានព្រំប្រទល់ជាប់នឹងអ៊ុយក្រែន បានរិះគន់ការលុកលុយនេះ និងការបង្កសង្គ្រាមរបស់រុស្ស៊ីមកលើប្រទេសជិតខាង៕