មជ្ឈមណ្ឌលសូត្រគម្ពីរកូរ៉ាន នៅតំបន់ក្រីក្រហ្គាហ្សាស្ទ្រីប (Gaza Strip) បានឃើញចំនួនសិស្សសាលាវ័យជំទង់កើនឡើង ដោយក្មេងៗទាំងនោះ សង្ឃឹមថា នឹងបានមករៀនពីរបៀបសូត្រគម្ពីរកូរ៉ាន ដែលជាគម្ពីរពិសិដ្ឋរបស់អ្នកកាន់សាសនាអ៊ីស្លាម។

ទោះបីជាមជ្ឈមណ្ឌលសូត្រគម្ពីរកូរ៉ាន ត្រូវបានបើកពីដើមឆ្នាំរហូតដល់ចុងឆ្នាំក៏ដោយ ក៏ជាទូទៅ គេច្រើនតែឃើញការកើនឡើងចំនួនអ្នកដាក់ពាក្យ អំឡុងពេលឈប់សម្រាករដូវក្តៅ នៅទឹកដីអភិរក្សនិយមនេះ។

អ្នកមើលការខុសត្រូវនៅមជ្ឈមណ្ឌលមួយ បាននិយាយថា ការប៉ុនប៉ងនៅក្នុងប្រទេសអឺរុបមួយចំនួន ដើម្បីដុតច្បាប់ចម្លងនៃគម្ពីរពិសិដ្ឋរបស់សាសនអ៊ីស្លាមនេះ បានជំរុញឲ្យគ្រួសារកាន់តែច្រើនបញ្ជូនកូនរបស់ពួកគេទៅរៀនសូត្រគម្ពីរកូរ៉ាន។

ទន្ទឹមនឹងនេះដែរ ក្មេងៗមួយចំនួន បាននិយាយថា ការលះបង់ពេលវេលា ដើម្បីមកសិក្សាគម្ពីរកូរ៉ាននេះ បានជួយបង្វែរការយកចិត្តទុកដាក់របស់ពួកគេពីអ្វីដែលពួកគេបានពិពណ៌នាថា ជាហ្គេមអនឡាញ និងកម្មវិធីបណ្ដាញសង្គមនានា ដែលនាំឲ្យខាតពេលវេលា និងប្រយោជន៍៕