កីឡាការិនីប្រណាំងកង់ហូឡង់ Yara Kastelijn រកបាន​ជ័យជំនះ​ក្នុង​ដំណាក់​កាល​លើក​ដំបូង​ នៅក្នុ​ង​ព្រឹត្តិការណ៍ ប្រណាំងកង់លំដាប់ World Tour បន្ទាប់ពីឈ្នះដំណាក់កាលទី ៤ ប្រណាំង​កង់ Tour de France ផ្នែកនារី។

ដំណាក់កាលទី ៤ ដែលមានចំងាយផ្លូវ ១៧៧ គីឡូម៉ែត្រ កីឡាការិនីដែលជិះឱ្យក្រុម Fenix-Deceuninck រូបនេះបានមកដល់ទីព្រ័ត្រមុនគេប្រើពេល ៤ ម៉ោង ៣៨ នាទី ៣៩ វិនាទី តាម​ពី​ក្រោយ​​ដោយ​មិត្តរួមជាតិហូឡង់ Demi Vollering និង Anouska Koster សុទ្ធតែជាងលើសពី ១ នាទី។

យ៉ាងណាក្តីក្រោយឆ្លងកាត់ ៤ ដំណាក់កាលនេះ អ្នកនាំ​មុខ​គេ​ក្នុង​តារាង​វេលារួ​ម​នៅ​តែ​ជា​កីឡាការិនី​ប៊ែលហ្ស៊ិក Lotte Kopecky ដដែល មានថេរវេលាសរុបល្អជាងអ្នកលេខ ២ កីឡាកា​រិនី​ហូឡង់ Demi Vollering ៤៣ វិនាទី ខណៈ លេខ ៣ គឺកីឡាការិនីអាហ្វ្រិកខាងត្បូង Ashleigh Moolman ដដែលយឺតជាងអ្នកនាំមុខ ៥១ វិនាទី។

សម្រាប់ដំណាក់កាលទី ៥ ថ្ងៃនេះមានចំងាយផ្លូវ ១២៦ គីឡូម៉ែត្រ ហើយ​ការ​ប្រកួត​នឹង​បិទ​បញ្ចប់​ទាំង​ស្រុង​នៅ​ដំណាក់កាលទី៨ ថ្ងៃអាទិត្យនេះ៕ អត្ថបទ៖នាង សុភាវុធ