ភ្នំពេញ ៖ ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌បានព្រមានដកចៅក្រម ឬព្រះរាជអាជ្ញាណាមិនគោរពវិន័យក្រមសីលធម៌ ដោយបានបញ្ជាទៅខាងអធិការកិច្ច និងរដ្ឋបាលតុលាការ ផ្ទៀងផ្ទាត់ពីបញ្ជីឈ្មោះវត្តមានចៅក្រម និងព្រះរាជអាជ្ញាឡើងវិញឲ្យបានត្រឹមត្រូវ ដើម្បីដាក់វិន័យ ឬលុបឈ្មោះចេញពីក្របខណ្ឌ ចំពោះចៅក្រម និងព្រះរាជអាជ្ញាទាំងឡាយណា ដែលអវត្តមានដោយមិនមានការអនុញ្ញាត។

​

ការព្រមានរបស់ឯកឧត្តម កើត រិទ្ធ បែបនេះបានធ្វើឡើងក្នុងពិធីប្រកាសតែងតាំង និងចូលកាន់មុខតំណែងប្រធានសាលាឧទ្ធរណ៍ភ្នំពេញ ប្រធានសាលាដំបូងខេត្តកំពង់ស្ពឺ ប្រធានសាលាដំបូងខេត្តកំពង់ឆ្នាំង ប្រធានសាលាដំបូងខេត្តព្រៃវែង និងព្រះរាជអាជ្ញានៃអយ្យការអមសាលាដំបូងខេត្តព្រៃវែង នៅថ្ងៃទី១៩ ខែឧសភា។ឯកឧត្តមបន្តថាមានចៅក្រម និងព្រះរាជអាជ្ញាមួយចំនួនបានឈប់លើសពី២-៣ខែ ដោយគ្មានការអនុញ្ញាតិ។ ឯកឧត្តមបន្ថែមថា ការឈប់ដោយខុសច្បាប់នេះ បើយោងតាមមាត្រា៥២ នៃច្បាប់ស្តីពីលក្ខន្តិកៈចៅក្រម និងព្រះរាជអាជ្ញា ត្រូវប្រឈមនឹងការលុបឈ្មោះចេញពីក្របខណ្ឌ។

ពាក់ព័ន្ធនឹងករណីនេះ ឯកឧត្តមបានដាក់បទបញ្ជាឲ្យខាងអធិការកិច្ច រួមទាំងរដ្ឋបាលតុលាការផ្ទៀងផ្ទាត់ឡើងវិញ ចំពោះចៅក្រម និងព្រះរាជអាជ្ញាណា ដែលអវត្តមានខុសច្បាប់ ដោយទី១ តម្រូវឱ្យមានបញ្ជីវត្តមានមួយត្រឹមត្រូវ, ទី២ត្រួតពិនិត្យនិងអនុវត្តតាមមាត្រា៥២នៃច្បាប់ស្តីពីលក្ខន្តិកៈ ចៅក្រម និងព្រះរាជអាជ្ញា។ ឯកឧត្តមបានសង្កត់ធ្ងន់ថា ចំពោះចៅក្រមរូបណា មិនបានបំពេញការងារលើសពី១៥ថ្ងៃត្រូវកាត់ប្រាក់បៀរវត្សន៍ ហើយប្រសិនបន្តអវត្តមានលើស១៥ថ្ងៃ ត្រូវចាត់ទុកថា បោះបង់ការងារ ដោយត្រូវពិន័យ ឬបណ្តេញចេញពីក្របខណ្ឌ។ឯកឧត្តមបានបញ្ជាក់ទៀតថាការអវត្តមានរបស់មន្រ្តីក្នុងវិស័យយុត្តិធម៌នេះធ្វើឲ្យសំណុំរឿងជាច្រើនត្រូវកកស្ទះ និងបង្កជាឧបសគ្គដល់ការស្វែងរកយុត្តិធម៌ជូនប្រជាពលរដ្ឋ។ឯកឧត្តមបានចាត់ទុកការមិនមកបំពេញការងារ ហើយបើកតែប្រាក់បៀរវត្សន៍នោះ គឺផ្ទុយនឹងមនសិការទាំងស្រុង។ឯកឧត្តមក៏បានណែនាំចៅក្រម ព្រះរាជអាជ្ញា ក៏ដូចជាមន្ត្រីតុលាការទាំងអស់ត្រូវប្រកាន់ភ្ជាប់នូវអភិក្រមទាំង៥ របស់សម្តេចតេជោ ហ៊ុន សែន នាយករដ្ឋមន្រ្តីរួមមាន ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់និងត្រូវប្រកាន់ខ្ជាប់ភាពម៉ឺងម៉ាត់របស់ខ្លួនក្នុងការអនុវត្តច្បាប់ឲ្យបានត្រឹមត្រូវជូនប្រជាពលរដ្ឋ។ ឯកឧត្តមបន្តថា មន្រ្តីទាំងអស់ត្រូវចូលរួមលើកកម្ពស់កិត្តិយស សេចក្តីថ្លៃថ្នូរ និងកិត្យានុភាពនៃអង្គចៅក្រម ដោយប្រកាន់ខ្ជាប់នូវវិន័យក្រមសីលធម៌ វិជ្ជាជីវៈចៅក្រមទាំងពេលបំពេញការងារ និងក្នុងជីវភាពរស់នៅប្រចាំថ្ងៃ ដើម្បីចូលរួមប្រកបដោយឆន្ទៈក្នុងស្មារតីទទួលខុសត្រូវខ្ពស់ក្នុងការអនុវត្តយុទ្ធនាការការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត ប្រកបដោយភាពត្រឹមត្រូវ លឿន និងមិនពុករលួយ៕អត្ថបទ៖ ឧត្តម