វិទ្យាស្ថានសិក្សាពីសង្គ្រាម (ISW) បានបង្ហាញថា កងនាវាចរណ៍សមុទ្រខ្មៅរបស់រុស្ស៊ី កំពុងបង្កើនវត្តមានយោធារបស់ខ្លួននៅក្នុងសមុទ្រខ្មៅ ដែលទំនងជានៅក្នុងការប៉ុនប៉ង ដើម្បីបង្កើតលក្ខខណ្ឌសម្រាប់ការបង្ខំឲ្យបញ្ឈប់ និងស្វែងរកនាវាស៊ីវិល និងបង្កើនការគ្រប់គ្រងនៅក្នុងតំបន់នេះ។

មជ្ឈមណ្ឌលប្រព័ន្ធផ្សព្វផ្សាយយោធា និងក្រសួងការពារជាតិអង់គ្លេស បានរាយការណ៍ថា កងកម្លាំងរុស្ស៊ីកំពុងរៀបចំនាវានៅក្នុងសមុទ្រខ្មៅ ដើម្បី«ពង្រឹងការបិទផ្លូវទៅអ៊ុយក្រែន»។

ក្នុងពេលជាមួយគ្នានោះ ISW បាននិយាយថា ទោះបីជាមានការបង្កើនវិធានការប្រឆាំងនឹងនាវាស៊ីវិលក៏ដោយ កងនាវាចរណ៍សមុទ្រខ្មៅ ទំនងជាមិនអាចអនុវត្តការបិទទាំងស្រុងទៅប្រទេសអ៊ុយក្រែនបានទេ។

ទោះបីជាយ៉ាងណាក៏ដោយ ការរារាំងទាំងស្រុងរបស់រុស្ស៊ីទៅលើអ៊ុយក្រែននៅសមុទ្រខ្មៅ មានន័យថា កងកម្លាំងរុស្ស៊ី អាចបើកការបាញ់ប្រហារលើនាវាទាំងអស់ ដែលព្យាយាមចូលទៅដល់អ៊ុយក្រែន។

តាមគំនិតរបស់អ្នកជំនាញ រុស្ស៊ីទំនងជាមិនព្យាយាមដាក់ការបិទផ្លូវទាំងស្រុងបែបនេះ ដោយមិនបង្កជម្លោះយោធាជាមួយបណ្តាប្រទេសឆ្នេរសមុទ្រខ្មៅ រួមទាំងសមាជិកណាតូ រូម៉ានី ប៊ុលហ្គារី និងទួរគីទេ។