ស្របពេលដែលស៊ូទ្រាំការលំបាកខ្លាំងដោយសារសីតុណ្ហភាពកើនឡើងខ្ពស់ខ្លាំងពេក និងការដាច់ចរន្តអគ្គិសនីញឹកញាប់នៅក្នុងប្រទេសស៊ីរីនោះ លោក Jubran Kourier គឺជានិយោជិកមួយរូប និងភរិយា Natalie របស់លោក បានចំណាយពេលថ្ងៃកាន់ដបទឹកបាញ់ និងកន្សែងជក់ទឹក ដើម្បីធ្វើឲ្យខ្លួនរបស់ពួកគេត្រជាក់ ។

ប្តីប្រពន្ធ ២នាក់នេះ បាននិយាយរៀបរាប់ផងដែរពីការលំបាកសម្រាប់ទូទឹកកករបស់ពួកគេ ពេលដែលចរន្តអគ្គិសនីមកវិញ ដោយពួកគេព្យាយាមញាត់ដបទឹកឲ្យពេញទូទឹកកក ដើម្បីសង្ឃឹមថានឹងបានទឹកប្រជាក់ដ៏ស្រស់ស្រាយមកទទួលទាន ។

ដូចគ្នានឹងប្រជាពលរដ្ឋជាច្រើនទៀតនៅស៊ីរីដែរ ពួកគេនិយាយថា ពួកគេគ្មានលទ្ធភាពដំឡើងផ្ទាំងស្រូបថាមពលពន្លឺព្រះអាទិត្យនោះទេ ដើម្បីប៉ះប៉ូវការខ្វះខាត់អគ្គិសនីបែបនេះ ។ ផ្ទុយទៅវិញ ពួកគេអាស្រ័យលើការប្រើប្រាស់ថ្ម សម្រាប់កង្ហារយួរដៃប៉ុណ្ណោះ ។

កន្លែងផ្សេងទៀតនៅក្នុងទីក្រុងដាម៉ាស់ លោក George Beshara គឺជាអ្នករត់តាក់ស៊ីមួយរូប បានផ្លាស់ប្តូរម៉ោងធ្វើការរបស់លោក ដើម្បីជៀសវាងពេលក្តៅខ្លាំងបំផុត ។

លោកនិយាយថា វាធ្វើឲ្យប៉ះពាល់ដល់ប្រាក់ចំណូលរបស់ពួកយើង ដោយសារពេលដែលអ្នកធ្វើការ ១០ម៉ោង វាមិនដូចជាពេលដែលអ្នកធ្វើការត្រឹមតែ ២ម៉ោងទេ ។ វាពិតជាធ្វើឲ្យប៉ះពាល់ខ្លាំងដល់ប្រាក់ចំណូលច្រើនមែន ។

កាលពីសប្តាហ៍មុន សីតុណ្ហភាពសកលលោក បានកើនឡើងខ្ពស់បំផុតជាប្រវត្តិសាស្រ្ត ហើយនិងបង្កឲ្យកើតមានភ្លើងឆេះព្រៃនៅតាមតំបន់ជាច្រើនទាំងនៅអឺរ៉ុប និងអាមេរិក ខណៈដែលតំបន់ផ្សេងទៀត ពិសេសនៅតំបន់អាស៊ីខាងត្បូង មានភ្លៀងធ្លាក់ខ្លាំង បង្កការជន់លិច និងបំណាក់ដី ធ្វើឲ្យប៉ះពាល់ដល់ទីក្រុងជាច្រើន ៕