នៅពេលដែលប្រជាជននីហ្សេរីយ៉ាបានឮជាលើកដំបូងអំពីការដកប្រាក់ឧបត្ថម្ភថ្លៃប្រេងឥន្ធនៈរបស់ប្រទេសនីហ្សេរីយ៉ា ហើយដោយបានបានឃើញតម្លៃប្រេងឥន្ធនៈកើនឡើងបីដងផងនោះ ពួកគេគិតថានឹងឈប់ប្រើប្រាស់ម៉ាស៊ីនភ្លើង ដែលផ្តល់ថាមពលដល់ផ្ទះសម្បែងរបស់ពួកគេ ដើម្បីសន្សំប្រាក់លើថ្លៃចំណាយ។

ប្រជាជននីហ្សេរីយ៉ាបានពឹងផ្អែកលើប្រេងសាំងក្នុងការផ្គត់ផ្គង់ម៉ាស៊ីនភ្លើងដើម្បីជៀសវាងពីការដាច់ចរន្តអគ្គិសនីជាញឹកញាប់ មុនពេលប្រទេសអាហ្វ្រិកខាងលិចមួយនេះបានដកប្រាក់ឧបត្ថម្ភលើការផ្គត់ផ្គង់ប្រេងដោយសារវាត្រូវការចំណាយច្រើនពេក។ 

ការសម្រេចរបស់ប្រធានាធិបតី Bola Tinubu បានបង្ខំឱ្យជនជាតិនីហ្សេរីយ៉ាជាច្រើន ស្វែងរកជម្រើសដែលថោកជាងនេះ គឺដោយប្រើប្រាស់ឧស្ម័រដើម្បីផ្គត់ផ្គង់ថាមពលដល់ម៉ាស៊ីនភ្លើងរបស់ពួកគេវិញ។

ការផ្លាស់ប្ដូរនេះធ្វើឱ្យពលរដ្ឋនីហ្សេរីយ៉ាចំណាយប្រាក់ប្រហែល ៥០.០០០នីរ៉ា (៦៣,៤៥ដុល្លារ) ដើម្បីកែប្រែម៉ាស៊ីនភ្លើង ដែលឥឡូវនេះអនុញ្ញាតឱ្យពួកគេផ្លាស់ប្តូរយ៉ាងងាយស្រួលរវាងឧស្ម័នរាវ (ហ្គាស-LPG) ដែលត្រូវបានគេស្គាល់ថាជាប្រភេទប្រូផេន និងប្រេងឥន្ធនៈ ដែលជាការកែលម្អដ៏សំខាន់មួយទាក់ទងនឹងការកាត់បន្ថយចំណាយ។

យោងតាមលោក Kelvin Emmanuel អ្នកវិភាគនៅក្រុមហ៊ុន Dairy Hills Limited ដែលជាក្រុមហ៊ុនប្រឹក្សាគោលនយោបាយសាធារណៈបានឲ្យដឹងថា មានការព្រួយបារម្ភមួយ គឺថាឧស្ម័ននេះឆេះលឿនជាងនិងឆាប់អស់ជាងមុន ព្រោះវាស្រាលជាងសាំង។ 

ប្រទេសនីហ្សេរីយ៉ា ដែលជាប្រទេសផលិតប្រេងដ៏ធំបំផុតរបស់ទ្វីបអាហ្រ្វិក បាននាំចូលប្រេងចម្រាញ់ស្ទើរតែទាំងអស់របស់ខ្លួន ដោយសារតែសមត្ថភាពចម្រាញ់មិនគ្រប់គ្រាន់ និងការមិនយកចិត្តទុកដាក់ចំពោះរោងចក្រចម្រាញ់ដែលមានស្រាប់៕