ភ្នំពេញ៖ ក្រុមគ្រួសារក្រីក្រ មានបណ្ណសមធម៌ បច្ចុប្បន្នកំពុងទទួលបាននូវអត្ថប្រយោជន៍ជាច្រើនពីរាជរដ្ឋាភិបាលកម្ពុជា។ អត្ថប្រយោជន៍ទាំងនោះបូករួមទាំងការព្យាបាលនៅគ្រប់មន្ទីរពេទ្យរដ្ឋដោយមិនគិតថ្លៃ និងបូករួមទាំងការទទួលបានថវិកាឧបត្ថម្ភជាប្រចាំខែផងដែរ។

ស្របពេលការទទួលបានការជួយជាច្រើនពីរាជរដ្ឋាភិបាល​ ក្រុមគ្រួសារក្រីក្រនៅតែជឿជាក់ថា រាជរដ្ឋាភិបាលថ្មី ​ក្រោមការដឹកនាំរបស់ថ្នាក់ដឹកនាំថ្មី គឺនៅតែបន្តអ្វីដែលរាជរដ្ឋាភិបាលចាស់​បាននឹង​កំពុងជួយដល់ពួកគេ និងបង្កើនការយកចិត្តទុកដាក់បន្ថែមផងដែរ។

រយៈពេលប្រមាណ១ខែខាងមុខទៀតនេះ ​កម្ពុជានឹងមានរាជរដ្ឋាភិបាលថ្មីកើតឡើង ជាមួយនឹង​នាយករដ្ឋមន្រ្តីថ្មីផងដែរ។ នាយករដ្ឋមន្រ្តីថ្មី គឺឯកឧត្តម ហ៊ុន ម៉ាណែត ​កូនប្រុសច្បងរបស់ សម្ដេចតេជោ ហ៊ុន សែន។

សម្រាប់រាជរដ្ឋាភិបាលថ្មីដែលត្រៀមនឹងបង្កើតឡើងនេះ ត្រូវបានប្រជាពលរដ្ឋគ្រប់មជ្ឈដ្ឋានជឿជាក់ និងផ្ដល់ទំនុកចិត្តចំពោះការដឹកនាំប្រទេស ដែលអាចបន្តរក្សាសុខសន្តិភាព ការរីកចម្រើន និងការគិតគូដល់ប្រជាពលរដ្ឋគ្រប់រូប។

សម្រាប់ប្រជាពលរដ្ឋក្រីក្រមានបណ្ណសមធម៌ ដែលអាចចាត់ទុកថាជាក្រុមងាយរងគ្រោះ បង្ហាញការជឿជាក់ថា រាជរដ្ឋាភិបាលថ្មី ថ្នាក់ដឹកនាំថ្មី នឹងបន្តគាំទ្រយកចិត្តទុកដាក់ ជួយឧបត្ថម្ភដល់ពួកគេ ​ដូចអ្វីដែលពួកគេកំពុងទទួលបានក្នុងពេលបច្ចុប្បន្ន។ អត្ថប្រយោជន៍ដែលពួកគេទទួលបាននៅពេលនេះ គឺទទួលបានសេវាព្យាបាលដោយមិនគិតថ្លៃ និងការទទួលបានថវិកាជាប្រចាំខែផងដែរ។

រាជរដ្ឋាភិបាលថ្មីនេះ កើតចេញពីគណបក្សប្រជាជនកម្ពុជា ដែលទទួលបានជ័យជំនះ​ក្នុង​ការបោះឆ្នោតជ្រើសតាំងតំណាងរាស្រ្តនីតិកាលទី ៧។ ទោះមានការផ្លាស់ប្ដូរ សមាសភាព​នាយករដ្ឋមន្រ្តីថ្មីក្ដី សម្ដេចតេជោ ហ៊ុន សែន ក្នុងនាមជាប្រធានគណបក្សប្រជាជនកម្ពុជា បានលើកឡើងក្នុងការបើកយុទ្ធនាការឃោសនាបោះឆ្នោតថា​ គណបក្សប្រជាជនកម្ពុជា ដាក់​ចេញកម្មវិធីគោលនយោបាយជាអាទិភាពចំនួន ៦ ចំណុច ក្នុងកម្មវិធីនយោបាយរបស់រាជ​រដ្ឋាភិបាល​នីតិកាលទី ៧។ ចំណុចអាទិភាពទាំង ៦នេះ ក៏មានចំណុចមួយចំនួនផ្តោតលើ ក្រុមពលរដ្ឋងាយរងហានិភ័យផងដែរ។ ជាក់ស្ដែង នឹងមានការបណ្តុះបណ្តាលជំនាញវិជ្ជាជីវៈ និងបច្ចេកទេស ជូនដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ប្រមាណជាង ១,៥លាននាក់ ក្នុងកម្រិតសញ្ញាបត្របច្ចេកទេស និងវិជ្ជាជីវៈកម្រិត១ ដោយមិនបង់ថ្លៃសិក្សា

និងទទួលបាននូវប្រាក់ឧបត្ថម្ភប្រចាំខែ។ រីឯចំណុចសំខាន់មួយទៀត គឺបញ្ជាក់ពី ការធ្វើ​ស្ថាបនូបនីយកម្មកម្មវិធីជាតិជំនួយសង្គមសម្រាប់គ្រួសារក្រីក្រ, ក្រុមជនងាយរងគ្រោះ​នៅក្នុងគ្រួសារក្រីក្រ និងគ្រួសារងាយរងហានិភ័យនៅក្នុងគ្រាមានវិបត្តិសេដ្ឋកិច្ច និងគ្រាមាន​គ្រោះអាសន្ន ដើម្បីជួយទ្រទ្រង់ និងផ្ដល់ការគាំពារទាន់ពេល និងក្នុងលក្ខណៈជាប្រព័ន្ធជូន​ប្រជាពលរដ្ឋ ជាពិសេសគ្រួសារក្រីក្រ និងងាយរងគ្រោះ និងគ្រួសារងាយរងហានិភ័យ​ទៅតាមស្ថានភាពជាក់ស្តែងនៃវិបត្តិ ឬគ្រោះអាសន្ន ទូទាំងប្រទេស ដែលនឹងគ្របដណ្តប់លើប្រជាជនសរុបប្រមាណ ៤,៣លាននាក់។

ចំពោះផ្នែកសុខាភិបាលវិញ ក៏នៅបន្តផ្ដល់ការព្យាបាលជូនគ្រួសារក្រីក្រក្រីក្រ ងាយរងហានិភ័យ តាមរយៈការប្រើប្រាស់មូលនិធិសមធម៌សុខាភិបាល៕ អត្ថបទ៖ គឹមហុក