ភ្នំពេញ៖ ផ្នែកចក្ខុរោគ នៃមនី្ទរពេទ្យមិត្តភាពខ្មែរ-សូវៀត បានសហការជាមួយកម្មវិធីជាតិសុខភាពភ្នែក និងក្រុមគ្រូពេទ្យមកពីប្រទេសអូស្រ្តាលី បានផ្តល់ការពិនិត្យ និងព្យាបាលជំងឺទឹកដក់ក្នុងភ្នែក ​ចាប់ពីថ្ងៃទី២៤ រហូតដល់ថ្ងៃទី២៨ ខែកក្កដា និងចាប់ពីថ្ងៃទី៧ រហូតដល់ថ្ងៃទី១១ខែ សីហា ឆ្នាំ២០២៣។

ក្រុមគ្រូពេទ្យនៃប្រទេសទាំងពីរផ្តល់ការពិនិត្យ ព្យាបាលជំងឺភ្នែក ដែលបណ្តាលមកពីការប៉ះពាល់​ប្រព័ន្ធប្រសាទភ្នែក ដូចជាការបាត់បង់គំហើញដោយ​មិនដឹងមូលហេតុ​ ឬក្រោយការប៉ះទង្គិចក្បាល ការបាត់បង់ផ្នែកណាមួយ នៃការមើលឃើញ ភ្នែកស្រលៀង ត្របកភ្នែកធ្លាក់ ឬទាញឡើងទៅលើ ឬញាក់ខុសធម្មតា ​និងជំងឺទឹកដក់ក្នុងភ្នែក។

បើតាមលោកវេជ្ជបណ្ឌិត ឈួរ ឡុង ឯកទេសផ្នែកចក្ខុរោគ និងជានាយផ្នែកចក្ខុរោគ នៃមនី្ទរពេទ្យ​មិត្តភាពខ្មែរ-សូវៀត បានឲ្យដឹងថា ជារៀងរាល់ថ្ងៃ យើងបានផ្តល់សេវាពិគ្រោះ វះកាត់ អ្នកជំងឺភ្នែក​គ្រប់ប្រភេទ ព្រោះថានៅផ្នែកចក្ខុរោគនេះ​ យើងមានក្រុមគ្រូពេទ្យគ្រប់ឯកទេសទាំងអស់។ ដូច្នេះយើងមានលទ្ធភាពគ្រប់គ្រាន់ ​ក្នុងការផ្តល់សេវាជូនប្រជាពលរដ្ឋ។ មកដល់ពេលនេះ​ ផ្នែកចក្ខុរោគ មានគ្រូពេទ្យ ចំនួន១៩នាក់ ក្នុងនោះ១៦នាក់ ​មានឯកទេសជាន់ខ្ពស់ និងមាន​បន្ទប់ដាច់ដោយឡែក ចំនួន៧ និងបន្ទប់ធំ១ សម្រាប់អ្នកជំងឺសម្រាករួម។

ទន្ទឹមនឹងនោះលោកវេជ្ជបណ្ឌិត ក៏បានណែនាំដល់បងប្អូនប្រជាពលរដ្ឋ ថែទាំ​សុខភាពភ្នែកឲ្យ​បានល្អ ​ក្នុងករណីមានសញ្ញាអ្វីមួយមិនធម្មតា​ ត្រូវប្រញាប់​មកទទួលសេវាពិនិត្យ ព្យាបាល​ឲ្យបានទាន់ពេលវេលា ​ក៏ដូចជាអ្នកកើតជំងឺទឹកនោមផ្អែម​ ត្រូវតែម​កពិនិត្យបាតភ្នែក ​កុំរងចាំរហូត​ដល់​មានសញ្ញាងងឹតភ្នែក ​ឬស្រវាំងភ្នែកនោះទេ​ ជួន​កាលវាអាចយឺតពេល។ ​ដូច្នេះត្រូវតែ​មកពិនិត្យមុន ​ដើម្បីឲ្យក្រុមគ្រូពេទ្យបានដឹងពីស្ថានភាពរបស់អ្នកជំងឺ៕អត្ថបទ រដ្ឋា