ហ្ស៊កដានី៖ កាលពីថ្ងៃព្រហស្បតិ៍ (២៧ កក្កដា) សភានៃប្រទេសហ្ស៊កដានីបានគាំទ្រច្បាប់ឧក្រិដ្ឋកម្មតាមប្រព័ន្ធបច្ចេវិទ្យាអ៊ីនធឺណិត ដែលត្រូវបានរិះគន់យ៉ាងទូលំទូលាយដោយផ្តល់អំណាចដល់រដ្ឋាភិបាលក្នុងការគ្រប់គ្រងមាតិកាតាមអ៊ីនធឺណិត និងជំរុញឱ្យមានការព្រួយបារម្ភពីក្រុមសិទ្ធិមនុស្ស ដោយពួកគេនិយាយថា ច្បាប់នោះនឹងដកហូតសិទ្ធិសេរីភាពពលរដ្ឋរបស់ពួកគេ។

វិធានការនេះរឹតបន្តឹងការផ្តន្ទាទោសដាក់ពន្ធនាគារ និងពិន័យ សម្រាប់គេហទំព័រណាមួយ វេទិកាប្រព័ន្ធផ្សព្វផ្សាយសង្គម ឬអ្នកទទួលខុសត្រូវចំពោះគណនីសាធារណៈ ដែលត្រូវបានចាត់ទុកថាបានរំលោភលើឯកជនភាព និងនិយ័តកម្មមួយចំនួនទៀត។ 

សមាជិកសភាភាគច្រើនបានបោះឆ្នោតគាំទ្រច្បាប់នេះ បន្ទាប់ពីការជជែកដេញដោលរយៈពេលប្រាំមួយម៉ោង។ វាត្រូវបានគេរំពឹងថានឹងត្រូវបានអនុម័តនៅប៉ុន្មានថ្ងៃខាងមុខនេះ។

នាយករដ្ឋមន្ត្រីប្រទេសហ្ស៊កដានីលោក Bisher al Khasawneh បាននិយាយថា វាចាំបាច់ក្នុងការបង្ក្រាបឧក្រិដ្ឋកម្មតាមប្រព័ន្ធបច្ចេកវិទ្យាអ៊ីនធឺណិត ដែលភាពឯកជនត្រូវបានរំលោភបំពាន ហើយបាននិយាយថា ការជំរិតទារប្រាក់តាមអ៊ីនធឺណិតបានបង្កឱ្យមានការប៉ះពាល់ជាខ្លាំងក្នុងសង្គម។

ច្បាប់នេះបានធ្វើឱ្យអ្នកសារព័ត៌មានមួយចំនួន ក្រុមសកម្មជនសិទ្ធិមនុស្ស និងក្រុមគាំទ្រលទ្ធិប្រជាធិបតេយ្យនៅក្នុងប្រទេសហ្ស៊កដានីបានរិះគន់ច្បាប់នេះដោយពួកគេនិយាយថា មិនមានភាពច្បាស់លាស់ ហើយនឹងធ្វើឱ្យមានផលប៉ះពាល់ធំទូលាយពេក។ 

ពួកគេបារម្ភថារដ្ឋាភិបាល នគរបាល ព្រមទាំងតុលាការ នឹងកាន់តែងាយស្រួលក្នុងការកាត់បន្ថយសិទ្ធិបញ្ចេញមតិដោយសេរី និងដាក់ទោសទណ្ឌចំពោះអ្នករិះគន់ដែលបង្ហោះខ្លឹមសារតាមអ៊ីនធឺណិតផងដែរ៕