ប្រភពនិងអ្នកជំនាញ បាននិយាយថា រដ្ឋបាលលោកបៃដិន ត្រៀមនឹងបង្កើនការផ្សព្វផ្សាយទៅកាន់ក្រុមហ៊ុនពាណិជ្ជកម្មលោកខាងលិច ក្រុមហ៊ុនធានារ៉ាប់រង និងម្ចាស់នាវាដឹកប្រេង ដើម្បីរំលឹកពួកគេឲ្យគោរពតាមការទប់តម្លៃរបស់ក្រុមប្រទេសG7 លើប្រេងរុស្ស៊ី ខណៈដែលការជួញដូរប្រេងឆៅលើសពីកម្រិតដែលបានកំណត់នោះ។

វិធីសាស្រ្តនេះ ឆ្លុះបញ្ចាំងពីបំណងប្រាថ្នារបស់ទីក្រុងវ៉ាស៊ីនតោនក្នុងការលើកទឹកចិត្តអ្នកទិញឲ្យប្រកាន់ខ្ជាប់នូវតម្លៃ ៦០ដុល្លារក្នុងមួយបារ៉ែល ដែលបានដាក់កាលពីខែធ្នូឆ្នាំមុនលើការនាំចេញប្រេងឆៅរុស្ស៊ីពីសមុទ្រដោយ G7 សហភាពអឺរ៉ុប និងអូស្ត្រាលីក្នុងការសងសឹកចំពោះសង្គ្រាមរបស់រុស្ស៊ីលើអ៊ុយក្រែន។

ពួកគេបាននិយាយថា រដ្ឋបាលនេះ ត្រូវបានគេរំពឹងថា នឹងប្រើយុទ្ធសាស្ត្រ «ទន់ភ្លន់» ជំនួសឲ្យការគំរាមកំហែងទូទៅនៃការអនុវត្តដ៏តឹងរ៉ឹងលើអ្នកបំពានដែលមានសក្តានុពល ព្រោះថា វាអាចប៉ះពាល់ដល់ទីផ្សារថាមពល។

ប្រភពដែលដឹងពីការគិតរបស់រដ្ឋបាលលោកបៃដិន បាននិយាយថា៖«ទំនោរដំបូងរបស់រតនាគារ គឺត្រូវទន់ភ្លន់មិនមែនបង្ខិតបង្ខំអ្នកដឹកប្រេង និងនាវាដឹកប្រេងឲ្យអនុវត្តទេ ប៉ុន្តែបង្ខំដោយស្ងាត់ៗ តាមរយៈលិខិត និងតាមទូរស័ព្ទ»។

ប្រភពដដែល បាននិយាយថា មន្ត្រីអាមេរិកទំនងជានឹងបង្កើនទំនាក់ទំនងជាមួយបណ្តាក្រុមហ៊ុនពាណិជ្ជកម្ម ម្ចាស់នាវាដឹកប្រេង ក្រុមហ៊ុនធានារ៉ាប់រង និងអ្នកដទៃទៀត ដោយរំឭកពួកគេថា ប្រសិនបើសេវាកម្មដែន  សមុទ្រភាគខាងលិច ត្រូវបានប្រើប្រាស់ ភ័ស្តុតាងបញ្ជាក់ត្រូវតែរក្សាទុកបង្ហាញថា ប្រេងរុស្ស៊ី ត្រូវបានទិញក្រោមតម្លៃ៦០ដុល្លារ។