ប្រធានាធិបតីរុស្ស៊ីលោក Vladimir Putin និយាយប្រាប់ក្រុមមេដឹកនាំអាហ្វ្រិកថា លោកនឹងផ្តល់ជូនពួកគេនូវគ្រាប់ធុញ្ញជាតិរាប់ម៉ឺនតោនក្នុងរយៈពេលប៉ុន្មានខែទៀតនេះ បើទោះបីជារងទណ្ឌកម្មលោកខាងលិចក៏ដោយ ។

 ថ្លែងនៅកិច្ចប្រជុំកំពូលរុស្ស៊ី-អាហ្វ្រិកក្នុងទីក្រុង St. Petersburg លោក Putinនិយាយថា រុស្ស៊ី រំពឹងថានឹងប្រមូលផលគ្រាប់ធុញ្ញជាតិច្រើនបំផុតក្នុងឆ្នាំនេះ ។

 លោកនិយាយថា ប្រទេសរបស់ពួកយើងអាចជំនួសគ្រាប់ធុញ្ញជាតិអ៊ុយក្រែនទាំងការធ្វើពាណិជ្ជកម្ម និងទាំងការផ្តល់ជាជំនួយឥតគិតថ្លៃ ដល់ប្រទេសក្រីក្របំផុតនៅអាហ្វ្រិក ជាពិសេសនៅពេលដែលពួកយើងរំពឹងថានឹងប្រមូលផលបានច្រើនបំផុតក្នុងឆ្នាំនេះ ។

 លោក Putinនិយាយប្រាប់កិច្ចប្រជុំកំពូលថា ជាង ៧០ភាគរយនៃគ្រាប់ធុញ្ញជាតិអ៊ុយក្រែន ដែលនាំចេញដោយសារតែកិច្ចព្រមព្រៀងបច្ចុប្បន្នផុតកំណត់នោះ បានដឹកជញ្ជូនទៅកាន់បណ្តាប្រទេសដែលរកបានប្រាក់ចំណូលខ្ពស់ ឬលើសពីមធ្យម ហើយប្រទេសដែលក្រីក្របំផុតដូចជាស៊ូដង់ ត្រូវបានគេមើលរំលង ហើយទទួលបានការដឹកជញ្ជូនគ្រាប់ធុញ្ញជាតិតិចជាង ៣ភាគរយប៉ុណ្ណោះ ។

 លោកបន្តថា នេះគឺជាស្ថានភាពផ្ទុយគ្នាស្រឡះ ។ ម្ខាងបណ្តាប្រទេសលោកខាងលិចរារាំងការផ្គត់ផ្គង់គ្រាប់ធុញ្ញជាតិ និងជីគីមីរបស់ពួកយើង ហើយម្ខាងទៀត លោកសូមនិយាយឲ្យច្បាស់ថា ពួកគេដាក់ការស្តីបន្ទោសដោយលាក់ពុតថាពួកយើងបង្កឲ្យកើតមានវិបត្តិបច្ចុប្បន្ននៅលើទីផ្សារស្បៀងអាហារពិភពលោក ។

 ខណៈពេលនោះដែរ លោក Azali Assoumaniគឺជាប្រធានសហភាពអាហ្វ្រិក ដែលនៅលើវេទិកាតែមួយជាមួយលោក Putinបានប្រើប្រាស់សុន្ទរកថាផ្ទាល់ខ្លួនរបស់លោក ដើម្បីអំពាវនាវឲ្យមានសន្តិសហវិជ្ជមានរវាងរុស្ស៊ី និងអ៊ុយក្រែន ៕