នាយករដ្ឋមន្ត្រីអូស្ត្រាលី លោក Anthony Albanese បាននិយាយដោយមានទំនុកចិត្តថា កិច្ចព្រមព្រៀងដើម្បីឲ្យសហរដ្ឋអាមេរិកព្រមលក់នាវាមុជទឹកដើរដោយថាមពលនុយក្លេអ៊ែរដល់អូស្ត្រាលី បានវិលត្រឡប់មកលើផ្លូវវិញហើយ មុនពេលមានកិច្ចពិភាក្សា រវាងរដ្ឋមន្ត្រីការពារជាតិ និងរដ្ឋមន្ត្រីការបរទេសនៃប្រទេសទាំង២ នៅថ្ងៃសុក្រ (ថ្ងៃទី២៨ ខែកក្កដា) នេះ។

សមាជិកសភាគណបក្សសាធារណរដ្ឋចំនួន ២៥នាក់ បានប្រាប់លោកប្រធានាធិបតី Joe Biden កាលពីថ្ងៃព្រហស្បតិ៍ (ទី២៧ ខែកក្កដា) ថា ផែនការលក់នាវាមុជទឹកវាយប្រហារ ៣គ្រឿងទៅឲ្យប្រទេសអូស្ត្រាលី ក្រោមកិច្ចព្រមព្រៀងដៃគូ AUKUS នឹង«ធ្វើឲ្យកងនាវាអាមេរិកចុះខ្សោយដែលមិនអាចទទួលយកបាន» ប្រសិនបើមិនមានផែនការច្បាស់លាស់ ដើម្បីយកមកជំនួសទេនោះ។

រដ្ឋមន្ត្រីការបរទេសអាមេរិក លោក Antony Blinken និងរដ្ឋមន្ត្រីការពារជាតិលោក Lloyd Austin ស្ថិតនៅក្នុងរដ្ឋ Queensland ប្រទេសអូស្ត្រាលី ដើម្បីចូលរួមវេទិកាពិគ្រោះយោបល់ថ្នាក់រដ្ឋមន្ត្រីអូស្ត្រាលី-សហរដ្ឋអាមេរិក (AUSMIN) ដែលវឌ្ឍនភាពលើកិច្ចព្រមព្រៀងនាវាមុជទឹកដើរដោយថាមពលនុយក្លេអ៊ែរ សន្តិសុខក្នុងតំបន់ និងថាមពលស្អាត នឹងក្លាយជាប្រធានបទចម្បង ដែលត្រូវយកចិត្តទុកដាក់យ៉ាងខ្លាំង។

នៅពេលត្រូវបានសួរអំពីលិខិតរបស់គណបក្សសាធារណរដ្ឋ ដែលបានកត់សម្គាល់ថា កិច្ចព្រមព្រៀង AUKUS គឺ«សំខាន់ខ្លាំងណាស់» ប៉ុន្តែមិនគួរធ្វើឲ្យកងនាវាអាមេរិកចុះខ្សោយនោះទេ លោក Albanese បានឆ្លើយប្រាប់អ្នកសារព័ត៌មាន នៅថ្ងៃសុក្រនេះយ៉ាងខ្លីថា៖ «ខ្ញុំមានទំនុកចិត្តខ្លាំងណាស់»។

សហរដ្ឋអាមេរិកគឺជាសម្ព័ន្ធមិត្តផ្នែកសន្តិសុខដ៏សំខាន់របស់អូស្ត្រាលី ហើយគម្រោងរបស់កិច្ចព្រមព្រៀង AUKUS ដែលបានប្រកាសជាមួយចក្រភពអង់គ្លេសក្នុងខែមីនានោះ នឹងឃើញសហរដ្ឋអាមេរិកលក់នាវាមុជទឹកដើរដោយថាមពលនុយក្លេអ៊ែរកម្រិត US Virginia ចំនួន ៣គ្រឿង នៅដើមទសវត្សរ៍ឆ្នាំ២០៣០ មុនពេលចក្រភពអង់គ្លេស និងអូស្ត្រាលី ផលិតនាវាមុជទឹកប្រភេទថ្មី SSN-AUKUS នៅទសវត្សរ៍បន្ទាប់៕