​បាល់ទាត់៖ ​ក្រុម​ជើងឯក English Premier League ឆ្នាំទៅ​ហង្ស​ក្រហម Liverpool បាន​ឡើង​មក​លំដាប់​លេខ ៤ ដែលជា​កៅអី​ចុងក្រោយ​មានឱកាស​លេង​នៅ Champions League រដូវ​កាល​ក្រោយបន្ទាប់ពី​ជ័យជំនះ ៣-០ នៅ​ទឹកដី Burnley​។

​​អ្នកចាត់ការ Liverpool លោក Jurgen Klopp ​បានចាត់ទុក​ជ័យជំនះ​នៅផ្ទះ Burnley​ យប់មិញ​ថា ​ជាការ​ឈ្នះ​នៅវគ្គ​ពាក់កណ្តាល​ផ្តាច់ព្រ័ត្រ និង​រង់ចាំ​នៅ​វគ្គ​ផ្តាច់ព្រ័ត្រ​ចុង​សប្តាហ៍​នេះ​ដើម្បី​ធានាថា Liverpool មានមុខ​នៅ UCL ឆ្នាំក្រោយ​។ ​​គ្រាប់​បាល់​របស់​ខ្សែប្រយុទ្ធ​ប្រេ​ស៊ី​ល Roberto Firmino ​នៅ​នាទី​ទី៤៣ បានធ្វើអោយ Liverpool នាំមុខ​នៅ​វគ្គ​ទីមួយ ១-០ មុនពេល​ដែល Nathaniel Phillips បន្ថែម​មួយគ្រា​ប់​ទៀត​នៅ​នាទី​ទី៥២ ហើយ Alex Oxlade-Chamberlain ជា​អ្នក​ស៊ុត​គ្រាប់​ចុងក្រោយ​នៅ​នាទី​ទី៨៨​។ ​​បី​ពិន្ទុ​នេះ​ធ្វើអោយ Liverpool ឡើង​មកឈរ​លេខ ៤ ក្នុង​តារាង​វិញ​មាន ១ពិន្ទុ​ពីក្រោម​ក្រុម​លេខ៣ Chelsea និងស្មើ​ពិន្ទុ​ជាមួយ​ក្រុម​លេខ ៥ Leicester City​។

ថ្ងៃអាទិត្យ​ចុង​សប្តាហ៍​នេះ​ជាការ​ប្រកួត​សប្តាហ៍​ចុងក្រោយ​បិទ​បញ្ចប់​រដូវ​កាល English Premier League ដោយក្រុម​ជើងឯក​រកឃើញ​ហើយ​គឺ Manchester City ឯ​ក្រុម​ធ្លាក់​ទាំងបី​ក៏​រកឃើញ​ដែរ​គឺ Fulham, West Brom ​និង Sheffield United នៅឡើយ​តែ​កៅអី Champions League និង Europa League ត្រូវ​សំរេច​នៅ​សប្តាហ៍​ចុងក្រោយ​នេះ​។ ​​សប្តាហ៍​ចុងក្រោយ Liverpool ត្រូវ​ទទួល Crystal Palace ស្របពេល Leicester City ទទួល Tottenham Hotspur និង Chelsea ទៅផ្ទះ Aston Villa ដោយ​ក្នុងចំណោម​បី​ក្រុម Liverpool, Chelsea និង Leicester City មានតែ​ពីរ​ទេ​ដែល​មានឱកាស​នៅ Champions League រដូវ​កាល​ក្រោយ​៕

​អត្ថបទ​៖​នាង សុភា​វុ​ធ