នីហ្សេ ៖ ក្រុមមេដឹកនាំរដ្ឋប្រហារនៅក្នុងប្រទេសនីហ្សេ បានប្រកាសឧត្តមសេនីយ Abdourahamane Tiani ជាប្រមុខរដ្ឋថ្មីកាលពីថ្ងៃសុក្រ ប៉ុន្មានថ្ងៃបន្ទាប់ពីបាននិយាយថាពួកគេបានបណ្តេញប្រធានាធិបតី លោក Mohamed Bazoum ចេញពីតំណែង នៅក្នុងការដណ្តើមគ្រប់កាន់កាប់អំណាចដោយយោធាលើកទី៧ នៅអាហ្វ្រិកខាងលិច និងភាគកណ្តាល ក្នុងរយៈពេលមិនដល់បីឆ្នាំ។

ភាពចលាចលនេះ បានធ្វើឱ្យមានការព្រួយបារម្ភអំពីសន្តិសុខក្នុងតំបន់ដែលប្រទេសនីហ្សេនេះ ជាសម្ព័ន្ធមិត្តដ៏សំខាន់ជាមួយប្រទេសមហាអំណាចលោកខាងលិច ដែលកំពុងស្វែងរកការទប់ស្កាត់ការបះបោរដោយក្រុមដែលមានទំនាក់ទំនងជាមួយក្រុមអាល់កៃដា និងក្រុមរដ្ឋអ៊ីស្លាម។

លោក Tiani គឺជាប្រធានអង្គរក្សប្រធានាធិបតី ដែលក្រុមទាហានបានឃុំខ្លួនលោក Bazoum នៅក្នុងវិមានរបស់លោកកាលពីថ្ងៃពុធ ដែលបណ្តាលឲ្យមានភាពច្របូកច្របល់ថាតើនរណាកំពុងគ្រប់គ្រងអំណាច។ 

ឧត្តមសេនីយ៍រូបនេះ បានបង្ហាញខ្លួននៅលើបណ្តាញទូរទស្សន៍រដ្ឋកាលពីថ្ងៃសុក្រដោយមានបដាសរសេរថាលោកគឺជាប្រធាននៃស្ថាប័នយោធាដែលទើបបង្កើតថ្មី គឺជាក្រុមប្រឹក្សាជាតិសម្រាប់ការការពារប្រទេស (CNSP) ។ បន្ទាប់មក លោកបានជួបជាមួយបណ្តារដ្ឋមន្ត្រី និងបានជំរុញឲ្យពួកគេសហការជាមួយរបបថ្មី។