ស៊ូដង់ ៖ មេដឹកនាំយោធាប៉ារ៉ាប្រទេសស៊ូដង់ ឧត្តមសេនីយ Mohamed Hamdan Dagalo ដែលគេស្គាល់ថា លោក Hemedti បានអំពាវនាវឱ្យមានការជំនួសការដឹកនាំរបស់កងទ័ពកាលពីថ្ងៃសុក្រ នៅក្នុងការបង្ហាញខ្លួនតាមកាមេរ៉ាជាលើកដំបូងរបស់លោកចាប់តាំងពីការប្រយុទ្ធគ្នាបានផ្ទុះឡើងកាលពីខែមេសា។

វីដេអូរបស់លោក Hemedti ត្រូវបានគេបង្ហោះលើទំព័របណ្តាញសង្គម Facebook របស់ក្រុមយោធាប៉ារ៉ា ។ វីដេអូបានបង្ហាញលោក ដែលត្រូវឈរអមជុំវិញដោយសមាជិកនៃក្រុមកងកម្លាំងគាំទ្ររហ័ស(RSF) ដែលសាទរខណៈលោកបានសុំអភ័យទោសដល់ប្រជាជនស៊ូដង់ចំពោះផលប៉ះពាល់នៃជម្លោះដែលនៅ បន្ត។ សារព័ត៌មាន Reuters មិនអាចផ្ទៀងផ្ទាត់ដោយឯករាជ្យអំពីកាលបរិច្ឆេទដែលវីដេអូនេះត្រូវបានថតនោះទេ។

ជម្លោះបានចាប់ផ្តើមជាង ១០០ ថ្ងៃមកហើយ ខណៈកងទ័ពស៊ូដង់ និងកងកម្លាំងគាំទ្ររហ័សយោធាប៉ារ៉ា (RSF) បានប្រជែងគ្នាដណ្តើមអំណាចក្នុងពេលមានការផ្លាស់ប្តូរតាមផែនការឆ្ពោះទៅរកការគ្រប់គ្រងបែបស៊ីវិល។ 

ជម្លោះនេះបាននាំឱ្យមានការភៀសខ្លួនចេញពីលំនៅឋានរបស់ប្រជាជនជាង៣ លាននាក់ និងបានធ្វើឱ្យប្រទេសនេះធ្លាក់ចូលទៅក្នុងវិបត្តិមនុស្សធម៌ដ៏អាក្រក់បំផុតរបស់ពិភពលោក។ 

យោងតាមអ្នកស្ម័គ្រចិត្តក្នុងតំបន់បានឲ្យដឹងថា យ៉ាងហោចណាស់ជនស៊ីវិល ៥៨០ នាក់ បានស្លាប់នៅក្នុងរដ្ឋធានី Khartoum ។