រុស្ស៊ី ៖ លោក Carl Skau អនុប្រធានកម្មវិធីស្បៀងអាហារពិភពលោក(WFP) បាននិយាយកាលពីថ្ងៃសុក្រថា  រុស្ស៊ីមិនបានផ្តល់ឲ្យកម្មវិធីស្បៀងអាហារពិភពលោក (WFP) នូវគ្រាប់ធញ្ញជាតោដោយឥតគិតថ្លៃនោះទេ រយៈពេលជិតពីរសប្តាហ៍បន្ទាប់ពីទីក្រុងមូស្គូបានដកខ្លួនចេញពីកិច្ចព្រមព្រៀងដែលអនុញ្ញាតឱ្យមានការនាំចេញគ្រាប់ធញ្ញជាតិរបស់អ៊ុយក្រែននៅសមុទ្រខ្មៅដោយសុវត្ថិភាព។ គ្រាប់ធញ្ញជាតិអ៊ុយក្រែនគឺជាប្រភពជំនួយស្បៀងអាហារចម្បងរបស់អង្គការសហប្រជាជាតិ។ លោក Skau បាននិយាយទៅកាន់អ្នកសារព័ត៌មានថា យើងមិនទាន់បានពិភាក្សាអំពីគ្រាប់ធញ្ញជាតិដោយឥតគិតថ្លៃណាមួយនោះទេរហូតមកដល់ពេលនេះ។ យើងមិនត្រូវបានគេទាក់ទងសម្រាប់ការពិភាក្សាបែបនេះនៅឡើយ។ ប្រធានាធិបតី រុស្ស៊ី លោក វ្ល៉ាឌីមៀ ពូទីន កាលពីថ្ងៃព្រហស្បតិ៍ បានប្រាប់មេដឹកនាំអាហ្រ្វិកនៅក្នុងកិច្ចប្រជុំកំពូលមួយក្នុងទីក្រុង St Petersburg ថា ទីក្រុងមូស្គូអាចជំនួសការនាំចេញគ្រាប់ធញ្ញជាតិរបស់អ៊ុយក្រែនទៅកាន់ទ្វីបអាហ្រ្វិក ហើយលោកនឹងផ្តល់ជំនួយគ្រាប់ធញ្ញជាតិរាប់ម៉ឺនតោនដល់ប្រទេសចំនួន៦ក្នុងរយៈពេលប៉ុន្មានខែខាងមុខនេះ។ អគ្គលេខាធិការអង្គការសហប្រជាជាតិលោក Antonio Guterres បានព្រមានកាលពីថ្ងៃព្រហស្បតិ៍ថា ការផ្តល់ជំនួយមួយក្តាប់តូចនឹងមិនជួយសម្រួលដល់ផលប៉ះពាល់ខ្លាំងនៃការបញ្ចប់កិច្ចព្រមព្រៀងគ្រាប់ធញ្ញជាតិសមុទ្រខ្មៅនោះទេ។ នៅក្រោមកិច្ចព្រមព្រៀងនាំចេញនៅសមុទ្រខ្មៅ កម្មវិធីស្បៀងអាហារពិភពលោក(WFP) បានទិញ និងដឹកជញ្ជូនគ្រាប់ធញ្ញជាតិចំនួន ៧២៥.០០០ តោនទៅកាន់ប្រទេសអាហ្វហ្គានីស្ថាន ជីប៊ូទី អេត្យូពី កេនយ៉ា សូម៉ាលី ស៊ូដង់ និងប្រទេសយេម៉ែន ក្នុងរយៈពេលមួយឆ្នាំកន្លងទៅនេះ។ កិច្ចព្រមព្រៀងនេះបានអនុញ្ញាតឱ្យអង្គការ WFP ទទួលបាន ៨០% នៃការទិញគ្រាប់ស្រូវសាលីរបស់ខ្លួននៅឆ្នាំនេះពីប្រទេសអ៊ុយក្រែន ដែលកើនឡើងពី ៥០% នៅឆ្នាំ ២០២១ និងឆ្នាំ ២០២២។ សរុបមក គ្រាប់ធញ្ញជាតិជិត ៣៣ លានតោន ត្រូវបាននាំចេញដោយអ៊ុយក្រែនក្រោមកិច្ចព្រមព្រៀងដែលមានបំណងប្រយុទ្ធប្រឆាំងវិបត្តិស្បៀងអាហារពិភពលោកដែលកាន់តែធ្ងន់ធ្ងរដោយការវាយលុករបស់រុស្ស៊ីនៅខែកុម្ភៈឆ្នាំ ២០២២ លើប្រទេសអ៊ុយក្រែន។