ចិន ៖ ទូរទស្សន៍រដ្ឋ CCTV បានរាយការណ៍នៅថ្ងៃសៅរ៍នេះថា កិច្ចខិតខំប្រឹងប្រែងស្តារឡើងវិញ កំពុងធ្វើឡើងនៅភាគខាងត្បូងប្រទេសចិន បន្ទាប់ពីព្យុះទីហ្វុងកំណាច Doksuri បានបោកបក់នៅទូទាំងតំបន់ និងបានបង្កឲ្យមានភ្លៀងធ្លាក់ខ្លាំង និងខ្យល់បក់ខ្លាំង។

នៅក្នុងវីដេអូ ដែលបានថតកាលពីថ្ងៃសុក្រ បុគ្គលិកសង្គ្រោះបន្ទាន់ត្រូវបានគេមើលឃើញ កំពុងសម្អាតយកដើមឈើធំៗដែលបាក់រលំចេញពីលើផ្លូវ និងជួយសង្គ្រោះពលរដ្ឋដែលជាប់ខ្លួនក្នុងទឹកជំនន់។

ទូរទស្សន៍ CCTV បានរាយការណ៍ថា នៅក្រុង Quanzhou( ឈ័នចូវ) នៃខេត្ត Fujian អ្នកភូមិចំនួន ៣៥ នាក់ត្រូវបានជួយសង្គ្រោះពីទឹកជំនន់ដែលមានជម្រៅរហូតដល់ ២ ម៉ែត្រ។

ល្បឿនខ្យល់របស់ព្យុះទីហ្វុង Doksuri បានខ្សោយកម្រិតទៅជាព្យុះត្រូពិចធ្ងន់ធ្ងរ ប៉ុន្តែភ្លៀងធ្លាក់ខ្លាំងនៅតែត្រូវបានគេរំពឹងថានឹងបន្តធ្លាក់ទៅភាគខាងជើងទីក្រុងប៉េកាំងនៅថ្ងៃអាទិត្យ ទី ៣០ ខែកក្កដា ឬថ្ងៃបន្ទាប់ទៀត។