កូរ៉េខាងជើង ៖ មេដឹកនាំប្រទេសកូរ៉េខាងជើង លោក គីម ជុងអ៊ុន បានជួបជាមួយគណៈប្រតិភូចិន ដែលបានទៅបំពេញទស្សនកិច្ចនៅទីក្រុងព្យុងយ៉ាង ដើម្បីប្រារព្ធខួបលើកទី ៧០ នៃការបញ្ចប់សង្គ្រាមកូរ៉េ និងបានប្តេជ្ញាថានឹងបង្កើនទំនាក់ទំនងរបស់ប្រទេសទាំងពីរឱ្យឈានដល់កម្រិតខ្ពស់ថ្មីមួយ។ 

លោក Kim បានរៀបចំពិធីទទួលស្វាគមន៍មន្ត្រីមកពីប្រទេសចិន ដឹកនាំដោយសមាជិកការិយាល័យនយោបាយបក្សកុម្មុយនិស្ត លោក Li Hongzhong កាលពីថ្ងៃសុក្រ។

គណៈប្រតិភូចិន គឺជាគណៈប្រតិភូដំបូងគេ ចាប់តាំងពីជំងឺរាតត្បាត COVID-19 បានផ្ទុះឡើង។

ទីភ្នាក់ងារសារព័ត៌មាន KCNA របស់ប្រទេសកូរ៉េខាងជើង បាននិយាយថា ដោយបានបញ្ជាក់ជាថ្មីនៅក្នុងកិច្ចពិភាក្សានេះគឺជាជំហររបស់ភាគី និងរដ្ឋាភិបាលនៃប្រទេសទាំងពីរ ក្នុងការដោះស្រាយស្ថានការណ៍អន្តរជាតិដ៏ស្មុគស្មាញតាមគំនិតផ្តួចផ្តើមរបស់ពួកគេ និងបង្កើនទំនាក់ទំនងជាមិត្តភាព និងកិច្ចសហប្រតិបត្តិការដោយភាពស្និទ្ធស្នាលឈានទៅកាន់ដំណាក់កាលខ្ពស់ថ្មីមួយ។

កិច្ចប្រជុំនេះ បានធ្វើឡើងបន្ទាប់ពីមន្ត្រីចិន និងរុស្ស៊ី បានឈរក្បែរគ្នាជាមួយលោក គីម កាលពីថ្ងៃព្រហស្បតិ៍ ខណៈពួកគេបានពិនិត្យឡើងវិញនូវមីស៊ីលដែលមានសមត្ថភាពបំពាក់នុយក្លេអ៊ែរថ្មីបំផុតរបស់លោក និងយានដ្រូននៅក្នុងព្យុហយាត្រាយោធាក្នុងរដ្ឋធានី។