ភ្លៀងធ្លាក់ដ៏ខ្លាំង អមដោយដុំទឹកកកកាលពីថ្ងៃសៅរ៍ (២៩ កក្កដា) បានធ្វើឱ្យមានការបំផ្លិចបំផ្លាញនៅក្នុងរដ្ឋធានីម៉ិចស៊ិចកូ ស៊ីធី នៃប្រទេសម៉ិកស៊ិក ដែលបណ្តាលឱ្យខូចខាតផ្លូវថ្នល់ និងហេដ្ឋារចនាសម្ព័ន្ធ ខណៈរដ្ឋជិតខាងនោះក៏បានជួបប្រទះនឹងការវាយប្រហារនៃព្យុះនេះ ជាមួយនឹងភ្លៀងធ្លាក់ខ្លាំង ទឹកជំនន់ ព្រមទាំងព្យុះសណុំទឹកកកផងដែរ។

របាយការណ៍ពីប្រព័ន្ធផ្សព្វផ្សាយក្នុងស្រុកបាននិយាយថា ភាគខាងជើងនៃរដ្ឋធានីម៉ិចស៊ិចកូ ស៊ីធី បានទទួលរងនូវភ្លៀងធ្លាក់យ៉ាងខ្លាំង។ 

វីដេអូដែលបានចែករំលែកនៅលើប្រព័ន្ធផ្សព្វផ្សាយសង្គមបង្ហាញពីតំបន់លំនៅឋាន Lindavista បានលិចលង់ក្នុងជំនន់ទឹកភ្លៀង ដែលធ្វើអោយផ្លូវនានាមិនអាចធ្វើដំណើរឆ្លងកាត់បាន។ 

ឥទ្ធិពលនៃព្យុះនេះបានពង្រីកហួសពីដែនកំណត់ក្នុងទីក្រុង ខណៈដែលរដ្ឋ Puebla និងរដ្ឋ Hidalgo របស់ប្រទេសម៉ិកស៊ិក ក៏រងផលប៉ះពាល់ផងដែរ។ 

នៅរដ្ឋ Puebla រចនាសម្ព័ន្ធផ្សារមួយបានដួលរលំដោយសារភ្លៀងធ្លាក់ខ្លាំង ដែលបានធ្វើឱ្យពាណិជ្ជករជាច្រើនរងខាតបង់យ៉ាងធ្ងន់ធ្ងរ។ ក្រុមអាជ្ញាធរកំពុងវាយតម្លៃពីទំហំនៃការខូចខាតនេះ ហើយគ្មានអ្នករងរបួសធ្ងន់ធ្ងរត្រូវបានរាយការណ៍ទេ៕