នៅថ្ងៃអាទិត្យ (៣០ កក្កដា)នេះ ក្រុមអាជ្ញាធរចិនបានបើកដំណើរការផែនការត្រៀមទប់ទល់ទឹកជំនន់ខ្ពស់បំផុតទីពីររបស់ប្រទេសនៅក្នុងតំបន់ប៉េកាំង-ធានជីន-ហឺប៉ី និងខេត្តសានស៊ីនៅភាគខាងជើង ព្រមទាំងខេត្តហឺណានភាគកណ្តាល ដើម្បីត្រៀមខ្លួនទប់ទល់ទឹកជំនន់ដែលអាចកើតមានឡើងដោយព្យុះទីហ្វុង Doksuri ។

ព្យុះ Doksuri ដែលជាព្យុះទីហ្វុងទីប្រាំក្នុងឆ្នាំនេះ បានបោកបក់ដល់ដីនៅខេត្តហ្វ៊ូជាន ភាគខាងកើតប្រទេសចិនកាលពីព្រឹកថ្ងៃសុក្រ ហើយបានបក់បោកឆ្ពោះទៅភាគពាយ័ព្យទៅកាន់តំបន់ដីជ្រៅកាលពីថ្ងៃសៅរ៍ ដោយនាំមកនូវខ្យល់បក់ និងភ្លៀងធ្លាក់យ៉ាងខ្លាំង។

នៅក្នុងរដ្ឋធានីប៉េកាំង ភ្លៀងធ្លាក់ខ្លាំងបំផុតនៅឆ្នាំនេះបានចាប់ផ្តើមនៅព្រឹកថ្ងៃអាទិត្យនេះ ដោយបង្កឱ្យមានការជូនដំណឹងពណ៌ក្រហមសម្រាប់ព្យុះភ្លៀង និងទឹកជំនន់។

ទីក្រុងនេះបានបិទឧទ្យាន និងកន្លែងទេសចរណ៍ភាគច្រើនរបស់ខ្លួនជាបណ្តោះអាសន្ន ដើម្បីជាការប្រុងប្រយ័ត្នប្រឆាំងនឹងព្យុះភ្លៀងខ្លាំងបំផុតមកទល់បច្ចុប្បន្ននៅក្នុងរដូវក្តៅនេះ។ ការតាំងពិព័រណ៍ពាណិជ្ជកម្ម និងថ្នាក់ក្រៅបណ្តាញក៏ត្រូវបានលុបចោលផងដែរ ដោយសារបញ្ហាសុវត្ថិភាព។

គិតត្រឹមម៉ោង ១៧:០០ថ្ងៃសៅរ៍ ក្រុមអាជ្ញាធរក្នុងតំបន់ក្នុងខេត្តហឺណាន បានជម្លៀសមនុស្សសរុបជាង ១៣.០០០នាក់។ ទន្ទឹមនឹងនេះដែរ ក្រុមប្រតិបត្តិការគ្រោះមហន្តរាយជាង ៣០.០០០នាក់នៅទូទាំងខេត្តត្រូវបានប្រមូលផ្តុំ និងត្រៀមខ្លួនជាស្រេចដើម្បីចេញប្រតិបត្តិការក្នុងករណីមានអាសន្នផងដែរ៕