មនុស្សយ៉ាងហោចណាស់ ៤៤នាក់បានស្លាប់ក្នុងការផ្ទុះមួយនៅក្នុងប្រទេសប៉ាគីស្ថាន អំឡុងពេលបាតុកម្មដែលរៀបចំដោយគណបក្សអ៊ីស្លាម។ 

មនុស្ស​ជាង ១០០នាក់ ក៏បានរងរបួសផងដែរ នៅក្នុងការផ្ទុះនៅក្នុងស្រុក បាជួ( Bajaur) ភាគ​ពាយព្យ​ជា​កន្លែងដែលគណបក្ស Jamiat Ulema-e-Islam-Fazl (JUI-F) កំពុង​រៀបចំ​កិច្ច​ប្រជុំ​មួយ​។

នគរបាលបានប្រាប់សារព័ត៌មាន BBC ថាពួក​គេបាន​រក​ឃើញ​ភស្តុតាង​ដែល​បង្ហាញ​ថា​ការ​ផ្ទុះនេះ​អាច​ជា​ការ​វាយប្រហារអត្តឃាត។

មន្ត្រីបាននិយាយថា ប្រតិបត្តិការជួយសង្គ្រោះត្រូវបានបញ្ចប់ ហើយអ្នក​របួស​ទាំង​អស់​ត្រូវ​បាន​បញ្ជូន​ទៅ​មន្ទីរពេទ្យ។

ក្រុមមន្ត្រី​បានព្រមានថា ចំនួនអ្នកស្លាប់អាចនឹងកើនឡើងបន្ថែមទៀត ខណៈដែលមនុស្ស ១៥ នាក់ស្ថិត​ក្នុង​ស្ថានភាពធ្ងន់ធ្ងរ។

មូលហេតុ​នៅ​ពីក្រោយការវាយប្រហារនេះមិនទាន់ច្បាស់លាស់នៅឡើយទេ។ កងកម្លាំង​សន្តិសុខ​បាន​បិទ​តំប​ន់នោះ និងកំពុងបើកការស៊ើបអង្កេត។

មនុស្សរាប់​រយនាក់បានចូលរួមសន្និបាតរបស់គណបក្សពលករ JUI-F កាលពី​ថ្ងៃ​អាទិត្យ​នៅ​ទី​ប្រជុំ​ជន ខា (Khar) ក្នុងស្រុកកុលសម្ព័ន្ធបាជួ(Bajaur) នៃខេត្ត ឃីប៊ើ ប៉ាកទុនខ្វា (Khyber Pakhtunkhwa) របស់ប្រទេសប៉ាគីស្ថាន ជិតព្រំដែនជាមួយប្រទេសអាហ្វហ្គានីស្ថាន។ 

ក្រុម​អាជ្ញាធរបានប្រកាសអាសន្នសុខភាពនៅមន្ទីរពេទ្យស្រុកមួយនេះ។ គួរឲ្យដឹងថា ប្រទេសប៉ាគីស្ថាន បានមើលឃើញការវាយប្រហារការបះបោរពី សំណាក់​ក្រុម​សកម្ម​ប្រយុទ្ធ​អ៊ីស្លាម​ជ្រុល​និយមចាប់តាំងពីឆ្នាំមុន នៅពេលដែលបទឈប់បាញ់មួយរវាង ក្រុម តេរីក អ៊ីតា​លី​បង់​ ប៉ាគីស្ថាន (Tehreek-e-Taliban Pakistan) និងរដ្ឋាភិបាលក្រុងអ៊ីស្លាម៉ាបាដ បាន​បរ​ជ័យ​៕​ អត្ថបទ៖ ក្រូច សុខមាន