​បាល់ទាត់៖ លោក ភា សុ​ភ័​ក្ដ្រា បាន​បញ្ជាក់​មូលហេតុ​មួយ​ចំនួនដែល​នាំ​ឲ្យ​ លោក​សម្រេចចិត្ត​ត្រឡប់​មក​ធ្វើ​គ្រូ​ជំនួយ​ក្រុម​ជម្រើស​ជាតិ​កម្ពុជា​ម្ដងទៀត បន្ទាប់ពី​លោក​បាន​ប្រកាស​លាឈប់​ពី​តំណែង​នេះកាលពី​ខែ​ឧសភា ឆ្នាំ​២០២០ ហើយ​ហេតុផល​សំខាន់គឺ​លោក​ចង់​រៀន​សូត្រ និង​ដកស្រង់​បទពិសោធន៍​ថ្មីៗ​ពី​គ្រូ​បង្វឹក​ថ្មី​លោក Ryu Hirose លើ​ជំនាញ​ថ្មី​មួយទៀតដែល​ទទួល​បាន​ការ​ទុក​ចិត្ត​ពី​អ្នកចាត់ការ​ទូទៅ​លោក Keisuke Honda គឺ​ជំនាញ Performance Coach។​

​គ្រូ​បង្វឹក​កាន់​សញ្ញាបត្រ A-License រូប​នេះ​បាន​បញ្ជាក់​ថា កាល​លោក​ធ្វើ​ជំនួយការ​លោក Felix G.Dalmas​ លោក​បាន​ទទួល​បទពិសោធន៍​ល្អ​ៗ​ជាច្រើន ហើយ​លើក​នេះ​ដូចគ្នាលោក​រំពឹង​ថា ការ​វិល​ត្រឡប់​មកកាន់​តួនាទី​ចាស់លើ​ជំនាញ​ថ្មី​នេះ នឹង​ធ្វើ​ឲ្យ​លោក​មាន​ភាព​កាន់តែ​ល្អ​ប្រសើរតាមរយៈ​ការរៀនសូត្រ​ជាមួយ​គ្រូបង្វឹក​ថ្មី ពិសេស​លើ​ជំនាញ Performance Coach ដែល​ផ្ដោត​សំខាន់​លើ​អនាគតនៃ​ការ​បង្កើត​ទម្លាប់​ហ្វឹកហាត់​កាយសម្បទា​ របស់​កីឡាករ​ម្នាក់ៗ ។​ ​ក្រឡេក​មក​ចាប់អារម្មណ៍​ការ​ជ្រើស​រើស​កីឡាករ ក្នុង​បរិបទ​កូ​វីដ​-១៩ វិញ លោក ភា សុ​ភ័​ក្ដ្រា បន្ថែម​ថា លោកគ្រូ​បង្គោល Ryu Hirose ពិតជា​ជួប​ការ​លំបាក សូម្បី​ក្លិប​នីមួយៗ​ក៏​មាន​ការ​លំបាក​ខ្លាំង​ដែរ។ តែ​ក្នុងនាម​គ្រូ​បន្ទុក​ការ​ហ្វឹក​ហាត់​កាយសម្បទា លោក​បាន​ជជែក​ជាមួយ​ក្លិប ក៏ដូចជា​គ្រូ​បង្វឹក ដើម្បី​នាំ​យក​កីឡាករ​មាន​សក្ដានុពល​មួយ​ចំនួន​មក​ហ្វឹកហាត់​បន្ថែម ដើម្បី​ពង្រឹង​​កាយសម្បទា​ពួកគេ មុន​ក្រុម​ជម្រើស​ជាតិ​កម្ពុជា​ចេញដំណើរ​ទៅ​ប្រទេស​បា​រ៉ែ​ន ​ចុងខែ​ឧសភា​នេះ​ផង​ដែរ​។​

​​គួរ​ដឹង​ថា លោក ភា សុ​ភ័​ក្ដ្រា នឹង​ត្រូវ​រួម​ដំណើរ​ជាមួយ​ក្រុម​គោព្រៃ​កម្ពុជា ក្រោម​ការដឹកនាំ​របស់​គ្រូ​បង្វឹក​ថ្មី​លោក Ryu Hirose ចាកចេញ​ទៅ​បា​រ៉ែ​ន​នា​ថ្ងៃ​ទី​២៨ ខែ​ឧសភា​ខាងមុខ ដើម្បី​ត្រៀម​ការប្រកួត​សេសសល់​ក្នុង​វគ្គ​ជម្រុះ​ ពានរង្វាន់​បាល់ទាត់​ពិភពលោក FIFA World Cup Qatar 2022 ចំនួន ៣​ប្រកួត​ចុងក្រោយ ពោល​គឺ​ត្រូវ​ជួប​ម្ចាស់ផ្ទះ​បា​រ៉ែ​ននា​ថ្ងៃ​ទី​៣ ខែ​មិថុនា​, ជួប​អ៊ីរ៉ាក់នា​ថ្ងៃ​ទី​៧ ខែ​មិថុនា និង​ជួប​អ៊ីរ៉ង់នា​ថ្ងៃ​ទី​១១ ខែ​មិថុនា ហើយ​ការប្រកួត​នេះនឹង​មាន​ផ្សាយ​បន្ដ​ផ្ទាល់​លើ​កញ្ចក់​ទូរទស្សន៍ BTV-News ផងដែរ៕

​អត្ថបទ៖ លី ឈុន​ឡា