ភ្នំពេញ ៖ នេះបើយោងតាមសេចក្តីជូនដំណឹងរបស់ក្រសួងវប្បធម៌ និងវិចិត្រសិល្បៈ ដែលBTV ព័ត៌មានទទួលបាននារសៀលថ្ងៃទី៣១ ខែកក្កដា ឆ្នាំ២០២៣នេះ គឺក្រសួងវប្បធម៌ នឹងរៀបចំមហោស្រពចាប៉ីដងវែងទូទាំងប្រទេស ឆ្នាំ២០២៣ ក្រោមប្រធានបទ «វប្បធម៌សន្តិភាព»។

ចាប៉ីដងវែង គឺជាឧបករណ៍កេសដេញ ជាទ្រព្យបេតិកភណ្ឌដែលដូនតាបានបន្សល់ទុកក្នុងសង្គមខ្មែរ ក្រោមការដឹកនាំដ៏ឈ្លៀសវៃរបស់រាជរដ្ឋាភិបាល ចាប៉ីដងវែង ត្រូវបានបញ្ចូលជាសម្បតិ្តបេតិកភណ្ឌ អរូបី នៃមនុស្សជាតិ របស់អង្គការយូណេស្កូ ក្នុងគោលបំណងថែរក្សា ការពារ និងលើកស្ទួយសិល្បៈចាប៉ីដងវែង។

ក្រសួងវប្បធម៌ និងវិចិត្រសិល្បៈ មានកិត្តិយស សូមជម្រាបជូនដំណឹង សិល្បករ-សិល្បការិនី ចាប៉ីដងវែង និងសាធារណជន ដែលមានទេពកោសល្យ និងជំនាញផ្នែកចាប៉ីដងវែង ចង់ចូលរួមប្រឡងប្រជែងក្នុងមហោស្រពនេះ ឲ្យបានជ្រាបថា ក្រសួងនឹងរៀបចំមហោស្រពចាប៉ីដងវែងទូទាំងប្រទេស ឆ្នាំ២០២៣ ក្រោមប្រធានបទ វប្បធម៌សន្តិភាព ដែលនឹងប្រព្រឹត្តទៅចាប់ពីថ្ងៃទី២-៣-៤ ខែតុលា ឆ្នាំ២០២៣ខាងមុខនេះ ប្រសិនបើបេក្ខជនមានបំណងចូលរួមប្រលងប្រជែងសមត្ថភាពចាប៉ីដងវែង សូមអញ្ជើដាក់ពាក្យចាប់ពីថ្ងៃផ្សាយដំណឹងនេះតទៅ ព័ត៌មានលំអិត សូមទាក់ទងតាមលេខទូរស័ព្ទ 089 570 777, 070 882 898, 066 986 676។

ចាប៉ីដងវែង ដែលបានបញ្ចូលជាសម្បត្តិបេតិកភណ្ឌអរូបី នៃមនុស្សជាតិរបស់អង្គការយូណេស្កូ កាលពីថ្ងៃទី៣០ ខែវិច្ឆិកា ឆ្នាំ២០១៦។ មហោស្រពចាប៉ីដងវែង ប្រារព្ធឡើងនៅសាលមហោស្រពនាយកដ្ឋានសិល្បៈទស្សនីយភាព និងមានការផ្សាយផ្ទាល់តាមរយៈបណ្ដាញសង្គមហ្វេសប៊ុក ផេកផ្លូវការរបស់ក្រសួងវប្បធម៌ និងវិចិត្រសិល្បៈ៕ អត្ថបទ៖ រដ្ឋា