ក្លិបបិសាចក្រហម Manchester United បាន​ឈានដល់​កិច្ច​ព្រមព្រៀង​ហើយ​ក្នុង​ការ​នាំយក​ខ្សែ​ប្រយុទ្ធ​ដាណឺម៉ាក Rasmus Hojlund ពីក្លិបអ៊ីតាលី Atalanta ក្នុងតម្លៃ ៧២ លានផោន នេះ​បើ​តាម​ការ​ចុះផ្សាយរបស់សារព័ត៌មានធំៗ នៅអង់គ្លេស។

កីឡាករវ័យ ២០ ឆ្នាំរូបនេះ បានព្រមព្រៀងក្នុងតម្លៃ ៧២ លានផោន កិច្ចសន្យា ៥ ឆ្នាំអម​ជាមួយ​ជម្រើស​បន្ត​បន្ថែមមួយឆ្នាំទៀត។

Rasmus Hojlund នឹងក្លាយជាកីឡាករដែលមានតម្លៃផ្ទេរខ្ពស់បំផុតទី ៦ ក្នុងប្រវត្តិសាស្រ្តរបស់ Manchester United និងក្លាយជាកីឡាករទី ៣ ដែលមកកាន់ Old Trafford រដូវក្តៅនេះបន្ទាប់ពី Mason Mount ពី Chelsea និងអ្នកចាំទី Andre Onana ពី Inter Milan។

Hojlund ដែលធ្លាប់លេងនៅក្លិបដាណឺម៉ាក FC Copenhagen និងក្លិបអូទ្រីស Sturm Graz ទើប​បានផ្លាស់ទៅកាន់ Atalanta នៅពេលចាប់ផ្តើមរដូវកាល ២០២២-២៣ ប៉ុណ្ណោះ។

រដូវកាលដំបូងរបស់កីឡាករវ័យ ២០ ឆ្នាំរូបនេះ ស៊ុតបញ្ចូលទីបាន ៩ គ្រាប់ក្នុងការបង្ហាញខ្លួន ៣២ លើក៕ អត្ថបទ៖ នាង សុភាវុធ