រលកកំដៅជាប្រវត្តិសាស្ត្រដែលបានវាយលុកភាគនិរតីរបស់សហរដ្ឋអាមេរិកពេញមួយខែកក្កដានេះ ដោយបានប៉ះពាល់អ្នកស្រុកជាច្រើនន និងធ្វើឲ្យអាកាសធាតុប្រៀបដូចជាឡដុតនំនោះ កំពុងចាប់ផ្តើមថយចុះជាមួយនឹងការមកដល់ភ្លៀងមូសុង។

ក្រុមអ្នកព្យាករណ៍អាកាសធាតុរំពឹងថាត្រឹមថ្ងៃច័ន្ទនេះ ប្រជាជននៅទីក្រុង Phoenix នឹងចាប់ផ្តើមមើលឃើញសីតុណ្ហភាពខ្ពស់ធ្លាក់ចុះក្រោម ១១០អង្សាហ្វារិនហៃ (៤៣,៣អង្សាសេ) ជាលើកដំបូងក្នុងរយៈពេលមួយខែ។

សេវាកម្មអាកាសធាតុជាតិបាននិយាយថា សីតុណ្ហភាពខ្ពស់នៅក្នុងទីក្រុងវាលខ្សាច់មួយនេះដែលមានអ្នកស្រុកជាង ១,៦លាននាក់ បានឡើងហួសកម្រិត១១០អង្សាហ្វារិនហៃ សម្រាប់រយៈពេល ៣០ថ្ងៃជាប់ៗគ្នា។

កំណត់ត្រាកាលពីមុននៃសីតុណ្ហភាព ១១០អង្សាហ្វារិនហៃ ឬខ្ពស់ជាងនេះ គឺបានកត់ត្រាទុកសម្រាប់រយៈពេល១៨ថ្ងៃកាលពីឆ្នាំ១៩៧៤ ។

អាកាសធាតុបានធ្លាក់ចុះត្រជាក់បន្តិចកាលពីថ្ងៃអាទិត្យ ដោយសារខ្យល់មូសុងត្រជាក់មកដល់។ សេវាកម្មអាកាសធាតុបានព្រមានថា អាកាសធាតុសើមបែបនេះក៏អាចនាំមកនូវការខូចខាត ខ្យល់បក់បោកធូលី និងឱកាសនៃទឹកជំនន់ភ្លាមៗផងដែរ៕