ចិន ៖ បុរសម្នាក់ដែលជាប់នៅក្នុងរថយន្តរបស់ខ្លួននៅក្នុងទឹកជំនន់ដ៏ខ្លាំងក្នុងប្រទេសចិន ត្រូវបានជួយសង្គ្រោះដោយក្រុមអ្នកពន្លត់អគ្គិភ័យ ខណៈពេលដែលមនុស្សផ្សេងទៀតត្រូវបានជម្លៀសចេញពីលំនៅឋានរបស់ពួកគេនៅក្នុងរដ្ឋធានីនៃប្រទេសនេះ ខណៈដែលភ្លៀងធ្លាក់ខ្លាំងបន្ទាប់ពីព្យុះទីហ្វុង Doksuri បានវាយប្រហារប្រទេសនេះ នេះបើយោងតាមទូរទស្សន៍រដ្ឋ CCTV នៅថ្ងៃចន្ទ (៣១ ខែកក្កដា) នេះ។

បុរសម្នាក់នេះត្រូវបានគេមើលឃើញជាប់នៅក្នុងរថយន្តរបស់ខ្លួន ដែលកំពុងលិចចូលទន្លេដ៏ជោរជន់ក្នុងទីក្រុងវ៉ូអាន (Wu'an) ក្នុងខេត្តហឺប៉ី (Hebei)។ 

រូបភាពដ៏គួរឱ្យរន្ធត់ពីប្រព័ន្ធផ្សព្វផ្សាយរដ្ឋ បានបង្ហាញថា រថយន្តនោះត្រូវបានបញ្ឈប់នៅចំណុចមួយ ហើយក្រុមអ្នកពន្លត់អគ្គិភ័យបានជួយសង្គ្រោះបុរសនោះ។ រថយន្តជាច្រើនក៏ត្រូវបានគេឃើញលិចក្នុងទឹកនៅតាមផ្លូវនានាក្នុងទីក្រុងប៉ាវទីង (Baoding) ក្នុងខេត្តហឺប៉ី ផងដែរ។

ទូរទស្សន៍រដ្ឋ CCTV បានរាយការណ៍ថា ទន្លេតាស៊ី (Dashi) ក្នុងទីប្រជុំជនតំបន់លីវលី (Liuli) ភាគនិរតីនៃទីក្រុងប៉េកាំង ក៏បានហក់ឡើងដោយសារតែទឹកជំនន់ផងដែរ ខណៈពេលដែលរដ្ឋាភិបាលក្នុងតំបន់បានជម្លៀសអ្នកស្រុកនៅក្នុងភូមិចំនួន៦ នៅក្នុងតំបន់កាលពីថ្ងៃអាទិត្យ (៣០ ខែកក្កដា)។

ព្យុះ Doksuri គឺជាព្យុះដ៏ខ្លាំងបំផុតមួយដែលបានវាយប្រហារប្រទេសចិនក្នុងរយៈពេលជាច្រើនឆ្នាំ ហើយបានបណ្តាលឱ្យមានទឹកជំនន់រីករាលដាលកាលពីចុងសប្តាហ៍នៅក្នុងខេត្តហ៊្វូជាន (Fujian) ភាគខាងត្បូង ដោយបានជំរុញឱ្យមនុស្សរាប់សែននាក់ចាកចេញពីផ្ទះរបស់ពួកគេ៕