នៅវ័យ ៧២ឆ្នាំ លោក Izzadin Zuhaira ដែលជាកសិករមួយរូបរបស់ស៊ីរី បានរស់រានពីសង្រ្គាម ការជម្លៀសខ្លួន និងការរញ្ជួយដីដ៏អាក្រក់បំផុតកាលពីខែកុម្ភៈកន្លងទៅ ប៉ុន្តែនៅសប្តាហ៍នេះ ភ្លើងឆេះព្រៃ បានឆាបឆេះផ្ទះរបស់លោក នៅខេត្ត Latakia ធ្វើឲ្យចម្ការផ្លែឈើជាទីស្រលាញ់របស់លោកក្លាយជាផេះ គឺជាទិដ្ឋភាពដ៏អាក្រក់បំផុតមួយដែលលោកពុំធ្លាប់ដែលឃើញ ។

មន្រ្តីរដ្ឋការចូលនិវត្តន៍ម្នាក់នេះ បានរស់នៅអាស្រ័យលើការប្រមូលផលដើមអូលីវ ដើមទទឹម និងដើមវ៉ល់ណាត់ប្រហែល ៧០០ដើមរបស់លោក ប៉ុន្តែដើមឈើទាំងអស់នេះ ត្រូវបានបំផ្លាញគ្មានសល់ដោយសារភ្លើងឆេះព្រៃ។

ផ្ទះចម្ការមួយជាន់ទំហំល្មមរបស់លោក ដែលត្រូវបានបំផ្លិចបំផ្លាញរួចទៅហើយដោយសារសង្រ្គាមរាប់ឆ្នាំនោះ បានប្រេះ ដោយសារការរញ្ជួយដីកាលពីខែកុម្ភៈ ដែលបានសម្លាប់មនុស្សជាង ៥ពាន់នាក់នៅក្នុងប្រទេសស៊ីរី ហើយនិងបានវាយប្រហារខ្លាំងខេត្ត Latakia របស់លោក។

ដូចគ្នានឹងប្រទេសផ្សេងទៀតនៅជុំវិញតំបន់សមុទ្រមេឌីទែរ៉ាណេដែរ ស៊ីរី រងគ្រោះធ្ងន់ធ្ងរដោយសារភ្លើងឆេះព្រៃក្នុងខែនេះ បង្កឡើងដោយសារតែខ្យល់បក់ខ្លាំង និងសីតុណ្ហភាពហក់ឡើងខ្ពស់ ។

រដ្ឋមន្រ្តីក្រសួងកសិកម្មស៊ីរីលោក Mohammad Hassaan Qatnaបាននិយាយកាលពីថ្ងៃសៅរ៍ចុងសប្តាហ៍កន្លងទៅថា ក្រុមភ្នាក់ងារពន្លត់អគ្គិភ័យ បានប្រឹងប្រែងពន្លត់ភ្លើងឆេះព្រៃនៅទីក្រុង Homsនិងទីក្រុង Hama កាលពីពាក់កណ្តាលខែកក្កដា ហើយភ្លើងឆេះព្រៃនៅខេត្ត Latakia បានឆាបឆេះអស់រយៈពេល ៥ថ្ងៃ មុនពេលក្រុមជួយសង្រ្គោះ អាចគ្រប់គ្រងវាបាន។

លោកបន្តថា ការងារប្រឈមដ៏លំបាកផ្សេងទៀតសម្រាប់ក្រុមភ្នាក់ងារពន្លត់អគ្គិភ័យ រួមមានការគ្របដណ្តប់ទូរគមនាគមន៍អន់នៅតំបន់ភាគខាងជើង និងការផ្គត់ផ្គង់សម្លៀកបំពាក់ការពារភ្លើង ឬគ្រឿងបង្គុំសម្រាប់ឧបករណ៍ពន្លត់អគ្គិភ័យ៕