បាល់ទាត់៖ រយៈពេលជិត ៣ខែមកហើយ ដែលការប្រកួតវគ្គផ្ដាច់ព្រ័ត្រលីគបាល់ទាត់នារីឆ្នាំ២០២០ ត្រូវបានពន្យារពេលដោយសារការអូសបន្លាយ នៃព្រឹត្តិការណ៍សហគមន៍ ២០កុម្ភៈ។ ទោះជាបែបនេះក្ដី ក្រុមបាល់ទាត់នារីព្រះខ័នរាជស្វាយរៀងនៅតែត្រៀមខ្លួនជានិច្ច ដើម្បីតតាំងជាមួយក្រុមកំពូលតារាងកំពង់ស្ពឺ-ណាហ្គាវើលដ៏ ដ្បិតសហព័ន្ធកីឡាបាល់ទាត់កម្ពុជា នៅមិនទាន់កំណត់កាលបរិច្ឆេទប្រកួតនៅឡើយ។
លោក ចាន់ ពេញ គ្រូបង្វឹកក្រុមបាល់ទាត់នារីព្រះខ័នរាជស្វាយរៀងបានឲ្យដឹងថា បច្ចុប្បន្នក្រុមខ្លួនកំពុងទន្ទឹងរង់ចាំការប្រកួតជាមួយការត្រៀមខ្លួនជានិច្ច។ ដូច្នេះលោកបានសំណូមពរជាថ្មី ដល់សហព័ន្ធកីឡាបាល់ទាត់កម្ពុជាក្នុងការកំណត់កាលបរិច្ឆេទ ដើម្បីរៀបចំការប្រកួតបញ្ចប់រដូវកាលចាស់ និងត្រៀមរដូវកាលថ្មី ដ្បិតលីគបាល់ទាត់បុរសបានចាប់ផ្ដើមដំណើរការការប្រកួតឡើងវិញហើយ។ សូមរំឭកថា មុនឡើងវគ្គផ្ដាច់ព្រ័ត្រលីគនារី ក្រុមព្រះខ័នរាជស្វាយរៀងបានទម្លាក់ក្រុមនារីខេត្ដបាត់ដំបង ដោយលទ្ធផល ២-១ ក្នុងវគ្គ Play-Off ហើយបានបន្ដយកឈ្នះក្រុមខ្លាំងភ្នំពេញក្រោនដោយលទ្ធផល ៣-១ ក្នុងវគ្គពាក់កណ្ដាលផ្ដាច់ព្រ័ត្រកាលពីថ្ងៃទី២១ ខែកុម្ភៈកន្លងទៅ។
ចំពោះការប្រកួតវគ្គផ្ដាច់ព្រ័ត្រជាមួយក្រុមកំពង់ស្ពឺ-ណាហ្គាវើលដ៏ ដំបូងឡើយគ្រោងប្រកួតនៅពហុកីឡដ្ឋានជាតិ តាំងពីថ្ងៃទី២៨ ខែកុម្ភៈម្ល៉េះ តែដោយសារស្ថានភាពជំងឺកូវីដ-១៩ មានការរីករាលដាលកាន់តែខ្លាំងនៅកម្ពុជា សហព័ន្ធក៏សម្រេចលើកពេលតែម្ដង ដោយរហូតមកទល់ពេលនេះនៅមិនទាន់កំណត់កាលបរិច្ឆេទថ្មីនោះទេ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
