ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ ​បានបញ្ជាក់ថា ​គណៈកម្មាធិការប្រចាំស្បៀង​បម្រុងកម្ពុជា ​ក៏បានត្រៀមរួចជាស្រេច​ ក្នុងការជួយសង្រ្គោះជាទុន ​ឬពូជស្រូវ ពូជបន្លែជូនដល់ប្រជាកសិករដែលរងការខូចខាតដោយសារគ្រោះធម្មជាតិទឹកជំនន់។

លោកជំទាវ អឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្មរុក្ខាប្រមាញ់ និង​នេសាទ កាលពីល្ងាចថ្ងៃទី៣១​ ខែកក្កដា​ ឆ្នាំ២០២៣នេះ ​មានប្រសាសន៍ប្រាប់ទូរទស្សន៍ព័ត៌មាន ប៊ីធីវី ដឹងថា​ យោងតាមសេចក្តីរាយការណ៍​តាមខេត្តមួយចំនួនដែលបាន​បញ្ជូនមក គឺមានផ្ទៃដីស្រែ​មួយចំនួនដែល​លិចលង់​ដោយសារជំនន់ទឹកភ្លៀង ​ហើយជំនន់ទឹកភ្លៀងវាធ្លាក់មកគំហុកប៉ុន្មានខែ។

អ្នកនាំពាក្យដដែលរូបនេះ ​បានឲ្យដឹងទៀតថា ​បច្ចុប្បន្ន​ក្រសួង​បាន​ត្រៀម​លក្ខណៈរួចរាល់​អស់​ហើយ ប៉ុន្តែរងចាំ​ការវាយតម្លៃ​ជាក់ស្តែង​ជាមុនសិន ​ថាតើផ្ទៃដី​ដែលរងផលប៉ះពាល់​មាន​ទំហំ ឬក៏ម្រិត​ប៉ុណ្ណា ​ហើយប្រជាពលរដ្ឋនៅតំបន់ណាខ្លះ ​ដែល​លោក​មានផ្ទៃដីអាចស្តារឡើងវិញបាន ហើយអាចមានលទ្ធភាពទទួលយកពូជស្រូវ ​ពូជបន្លែដែលយើងត្រៀមផ្តល់ជូនលោកទាំងអស់៕អត្ថបទ៖ ឈិត បូរ៉ាវី