អង្គការសម្រាប់កិច្ចសហប្រតិបត្តិការឥស្លាមកាលពីថ្ងៃចន្ទ បានជំរុញឲ្យប្រទេសជាសមាជិករបស់ខ្លួនឲ្យ ចាត់វិធានការប្រឆាំងនឹងប្រទេសដែលអនុញ្ញាតឲ្យមានការដុត ឬប្រមាថមើលងាយគម្ពីរកូរ៉ាន ជាសាធារណៈរួមទាំងការកោះហៅត្រឡប់មកវិញនូវឯកអគ្គរដ្ឋទូតទៀតផង។

ក្រុមដែលមានមូលដ្ឋាននៅអារ៉ាប៊ីសាអ៊ូឌីត បានធ្វើការអំពាវនាវនៅក្នុងសេចក្តីថ្លែងការណ៍មួយ បន្ទាប់ពីកិច្ចប្រជុំបន្ទាន់តាមអនឡាញរបស់រដ្ឋមន្ត្រីការបរទេសរបស់ខ្លួន ដើម្បីពិភាក្សាអំពីឧបទ្ទវហេតុថ្មីៗនេះ ដែលសៀវភៅពិសិដ្ឋរបស់ឥស្លាម ត្រូវបានដុតចោល ឬត្រូវបានបំផ្លាញ នៅក្នុងការតវ៉ាដែលត្រូវបានអនុញ្ញាតជាផ្លូវការនៅក្នុងប្រទេសស៊ុយអែត និងដាណឺម៉ាក។

សេចក្តីថ្លែងការណ៍នោះ បាននិយាយថា ប្រទេសសមាជិកចំនួន៥៧របស់អង្គការនេះ គួរតែ«ពិចារណាលើការសម្រេចចិត្ត និងសកម្មភាពចាំបាច់ ដែលពួកគេយល់ថា សមរម្យក្នុងទំនាក់ទំនងរបស់ពួកគេ» ជាមួយប្រទេសស៊ុយអែត ដាណឺម៉ាក និងប្រទេសផ្សេងទៀត ដែលអនុញ្ញាតឲ្យមានឧបទ្ទវហេតុបែបនេះ រួមទាំងការកោះហៅត្រឡប់មកវិញនូវឯកអគ្គរដ្ឋទូតរបស់ពួកគេផងដែរ។

ក្រុមនេះបានលើកទឹកចិត្តដល់អង្គការសង្គមស៊ីវិលក្នុងរដ្ឋជាសមាជិកឲ្យធ្វើការជាមួយសមភាគីក្នុងប្រទេសដែលគម្ពីរគូរ៉ាន ត្រូវបានដុតបំផ្លាញ ឬប្រមាថមើលងាយ ដើម្បីដាក់ពាក្យបណ្តឹងក្នុងស្រុក«មុននឹងយកសំណុំរឿងរបស់ពួកគេទៅកាន់ស្ថាប័នតុលាការអន្តរជាតិ ដែលអាចអនុវត្តបាន»។