ទូរទស្សន៍រដ្ឋ CCTV របស់ប្រទេសចិន បានរាយការណ៍នៅថ្ងៃអង្គារ (ទី១ ខែសីហា) នេះ ថា យោធាចិនបានបញ្ជូនឧទ្ធម្ភាគចក្រជាច្រើនគ្រឿង ដើម្បីចែកចាយជំនួយផ្គត់ផ្គង់ នៅភាគខាងលិចតំបន់ជាយក្រុងរបស់ទីក្រុងប៉េកាំង ដែលមានទឹកជំនន់លិចលង់យ៉ាងខ្លាំង។

រូបភាពនៅលើកញ្ចក់ទូរទស្សន៍ CCTV បានបង្ហាញឲ្យឃើញពីបុគ្គលិកកងទ័ពបញ្ជូនជំនួយផ្គត់ផ្គង់ចំនួន ៣,៥តោន ដែលរួមមានទឹក អាហារ និងរបស់ប្រើប្រាស់ប្រចាំថ្ងៃទៅកាន់ស្រុកតំបន់ភ្នំ Mentougou នៃទីក្រុងប៉េកាំង។ គេឃើញថា ផ្លូវជាច្រើនបានរងខូចខាត ដែលធ្វើឲ្យអ្នកស្រុកមិនអាចធ្វើដំណើរទៅកាន់ទីណាបានឡើយ។

ចំនួនអ្នកស្លាប់នៅទីក្រុងប៉េកាំង បានកើនដល់ ១១នាក់ហើយ នៅថ្ងៃអង្គារនេះ ដោយមនុស្ស ១៣នាក់ នៅតែបាត់ខ្លួន ខណៈដែលនៅខេត្តជិតខាង Hebei មនុស្ស ៩នាក់ បានស្លាប់ និង ៦នាក់ កំពុងបាត់ខ្លួន។

ទីក្រុងប៉េកាំង បានជួបប្រទះនូវបរិមាណទឹកភ្លៀងជាមធ្យម ២៦០មីលីម៉ែត្រ ចាប់តាំងពីថ្ងៃសៅរ៍ (ទី២៩ ខែកក្កដា) ដល់ព្រឹកថ្ងៃចន្ទ (ទី៣១ ខែកក្កដា) ដោយអាងស្តុកទឹក Changping Wangjiayuan ( ឆាងភីង វ៉ាងជៀយ័ន) បានឃើញអំណានកម្រិតទឹក ៧៣៨,៣មីលីម៉ែត្រ៕