កោះតៃវ៉ាន់ បានឃុំខ្លួនមន្ត្រីយោធាម្នាក់ និងអ្នកសហការជាច្រើននាក់ពីបទសង្ស័យផ្តល់អាថ៌កំបាំងយោធាទៅឲ្យប្រទេសចិន។

ក្រសួងការពារជាតិ បានឲ្យដឹងនៅថ្ងៃពុធនេះថា វរសេនីយ៍ទោម្នាក់ដែលមាននាមត្រកូល Hsieh( សៀ) និងចុងចោទផ្សេងទៀត ត្រូវបានសង្ស័យថា ត្រូវបានជ្រើសរើសដោយប្រទេសចិន ដើម្បីទម្លាយការសម្ងាត់ផ្នែកការពារជាតិ និងព័ត៌មានផ្សេងទៀត។

ការឃុំខ្លួននេះ កើតឡើង ខណៈភាពតានតឹងផ្នែកយោធារវាងចិននិងតៃវ៉ាន់ បន្តកើនឡើង។ ប្រទេសចិនបានអះអាងថាតៃវ៉ាន់ស្វ័យគ្រប់គ្រងមួយនេះថា ជាទឹកដីរបស់ខ្លួន ហើយបានធ្វើយុទ្ធនាការយូរអង្វែង ដើម្បីជ្រើសរើសបុគ្គលិកយោធាតៃវ៉ាន់ដែលចូលនិវត្តន៍ ដើម្បីផ្តល់អាថ៌កំបាំងរដ្ឋជាថ្នូរនឹងប្រាក់ ឬអំណោយផ្សេងៗ។

លោក Hsieh ក៏ត្រូវបានសង្ស័យផងដែរពីការបង្កើតអង្គការចារកម្មនៃបុគ្គលិកយោធាបច្ចុប្បន្ន និងចូលនិវត្តន៍ ដែលមានកាតព្វកិច្ចក្នុងការប្រមូលព័ត៌មានសម្ងាត់សម្រាប់ប្រទេសចិន នេះបើយោងតាមកាសែត Taipei Times ដែលបានដកស្រង់សម្តីរដ្ឋអាជ្ញាដែលមិនបញ្ចេញឈ្មោះនៅការិយាល័យរដ្ឋអាជ្ញាជាន់ខ្ពស់របស់កោះតៃវ៉ាន់។

ការិយាល័យនេះ មិនបានឆ្លើយសំណួរតាមអ៊ីមែលភ្លាមៗអំពីករណីនេះទេ។