តុលាការរុស្ស៊ីមួយ នឹងប្រកាសសាលក្រមរបស់ខ្លួននៅថ្ងៃសុក្រ ក្នុងការកាត់ទោសមេដឹកនាំបក្សប្រឆាំងដែលជាប់ពន្ធនាគារ លោក អាឡិចសេ ណាវ៉ាល់នី (Alexei Navalny) ដែលកំពុងប្រឈមមុខនឹងការចោទប្រកាន់ពីបទភាពជ្រុលនិយម ដែលអាចឲ្យរូបលោកជាប់ពន្ធនាគារ ជាច្រើនទសវត្សរ៍។

នៅក្នុងសេចក្តីថ្លែងការណ៍បិទរបស់ខ្លួនទៅកាន់តុលាការ បុរសវ័យ ៤៧ ឆ្នាំរូបនេះ បានរិះគន់ប្រតិបត្តិការយោធារបស់រុស្ស៊ីក្នុងប្រទេសអ៊ុយក្រែន ដែលត្រូវបានបន្តដោយការបង្រ្កាបដែលមិនធ្លាប់មានពីមុនមកលើអ្នករិះគន់រដ្ឋាភិបាលរបស់លោកប្រធានាធិបតី វ្ល៉ាឌីមៀ ពូទីន។

លោកណាវ៉ាល់នី បាននិយាយថា រុស្សី «កំពុងវង្វេងនៅក្នុងថ្លុកភក់ ឬថ្លុកឈាម»។

លោកបានប្រាប់តុលាការថា នៅជុំវិញបញ្ហានេះ មានមនុស្សរាប់ម៉ឺននាក់ ត្រូវបានសម្លាប់នៅក្នុងសង្រ្គាមខ្វះការពិចារណា និងគ្មានន័យបំផុតនៃសតវត្សរ៍ទី២១។

រដ្ឋអាជ្ញា បានសម្រេចឲ្យជាប់ពន្ធនាគាររយៈពេល២០ឆ្នាំជុំវិញការចោទប្រកាន់ដែលរួមមានការផ្តល់ហិរញ្ញប្បទានដល់សកម្មភាពជ្រុលនិយម ការញុះញង់ជាសាធារណៈនូវសកម្មភាពជ្រុលនិយម និងការស្តារឡើងវិញនូវ«មនោគមវិជ្ជាណាស៊ី» ។