ភ្នំពេញ ៖ គោរពប្រតិបត្តិតាមបញ្ញាតិរបស់ព្រះសម្មាសម្ពុទ្ធ ព្រះមរមគ្រូនៃយើង និងចូលរួមលើកស្ទួយនិង ថែរក្សាប្រពៃណី តាមពុទ្ធបញ្ញាតិ នៅរសៀលថ្ងៃពុធ១រោចខែទុតិយាសាឍ ឆ្នាំថោះ បញ្ចស័កព.ស២៥៦៧ ត្រូវនឹងថ្ងៃទី០២ ខែសីហា ឆ្នាំ២០២៣ សម្តេចកិត្តិព្រឹទ្ធបណ្ឌិតប៊ុនរ៉ានីហ៊ុនសែនប្រធានកាកបាទក្រហមកម្ពុជា រួមជាមួយក្រុមគ្រួសារ និងលោកជំទាវជាថ្នាក់ដឹក នាំកាកបាទក្រហមកម្ពុជា និងលោកជំទាវភរិយាថ្នាក់ដឹកនាំឥស្សរៈជនជាច្រើនរូបទៀត អញ្ជើញនាំយកទៀនវស្សា ប្រេងវស្សា គ្រឿងឧបភោគបរិភោគភេសជ្ជៈនិងបច្ច័យ ទៅវេរប្រគេន សម្តេចព្រះពោធិវង្សកិត្តិបណ្ឌិត អំ លឹមហេង សម្ដេចព្រះ សង្ឃនាយករងទី១ នៃព្រះរាជាណាចក្រកម្ពុជា, ព្រះប្រធានថេរសភា ព្រះពុទ្ធសាសនា និងព្រះថេរានុថេរៈគ្រប់ព្រះអង្គ ដែលត្រូវគង់ចាំព្រះវស្សាអស់កាលត្រីមាស ក្នុងពុទ្ធសីមាវត្តមុនីសុវណ្ណហៅ(ចំពុះក្អែក)ស្ថិតក្នុង សង្កាត់ព្រែកថ្មី ខណ្ឌ ច្បារអំពៅ រាជធានីភ្នំពេញ។

សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានបូជាទៀនធូប និងថ្វាយគន្ធពិដោ ចំពោះព្រះពុទ្ធបដិមា ស្នងអង្គ ព្រះសម្មាសម្ពុទ្ធ នៅលើមហាកុដិ ជាកិច្ចរំលឹក នឹកដល់គុណបុណ្យ ព្រះរតនត្រ័យ តាមប្រពៃណី ព្រះពុទ្ធសាសនា ដ៍រុងរឿងនៃយើង និងបានធ្វើបទនមសិកា ថ្វាយបង្គំព្រះពុទ្ធរូប,ថ្វាយបង្គំ ព្រះសង្ឃជាសាវ័គ និងសមាទានសីល តាមសិក្ខាបទ ដើម្បីរំលឹកនឹកដល់ព្រះសម្មាសម្ពុទ្ធព្រះបរមគ្រូនៃយើងដែលព្រះ អង្គត្រាស់ដឹងនូវ អនុត្តរៈសម្មាសម្ពោធិញាណ និងព្រះធម៌វិន័យ ដ៏វិសេសវិសាល បន្សល់ទុកអោយពុទ្ធបរិស័ទគ្រប់ ជំនាន់គោរពប្រតិបត្តិរហូតដល់ពេលបច្ចុប្បន្ន។ 

ការគោរពប្រតិបត្តិក្នុងការប្រារព្ធនូវពិធីបុណ្យទានផ្សេងៗតាមទំនៀមទំលាប់ប្រពៃណី ព្រះពុទ្ធសាសនា ដូចជាការវេរទៀនព្រះវស្សា និងទេយ្យទានប្រគេនព្រះសង្ឃ ក្នុងរដូវកាលចូលកាន់ព្រះវស្សាពី សំណាក់ សម្ដេចកិត្តិព្រឹទ្ធបណ្ឌិត និងក្រុមគ្រួសារក្នុងពេលនេះ គឺជាការចូលរួមចំណែក យ៉ាងសំខាន់ ក្នុងការថែរក្សា និងលើកតម្កើងវិស័យព្រះពុទ្ធសាសនា ដែលសាសនារបស់រដ្ឋឲ្យមានការរីកចំរើននិងគង់វង្សគ្រប់៥ពាន់ព្រះវស្សាតាម កាលកំណត់នៃព្រះសម្មាសម្ពុទ្ធព្រះបរមគ្រូនៃយើង។

ក្នុងពិធីព្រះពុទ្ធសាសនាប្រចាំឆ្នាំនេះ សម្តេចកិត្តិព្រឹទ្ធបណ្ឌិត និងក្រុមគ្រួសារព្រមទាំងលោកជំទាវ ជាពុទ្ធបរិស័ទទាំងអស់បានវរ ទៀនវស្សា គ្រឿងឧបភោគ បរិភោគ ភេសជ្ជៈ ប្រេងវស្សា និងគ្រឿងបរិក្ខា ប្រគេនសម្តេចព្រះពោធិវង្សកិត្តិបណ្ឌិត អំ លឹមហេង សម្តេចព្រះសង្ឃនាយករងទី១ នៃព្រះរាជាណាចក្រកម្ពុជា និងព្រះថេរានុថេរៈគ្រប់ព្រះអង្គ ដែលគង់ចាំព្រះវស្សាអស់កាលត្រីមាស ក្នុងពុទ្ធសីមាវត្តមុនីសុវណ្ណ ប្រកបដោយ សទ្ធាជ្រះថ្លាបបំផុត។ 

ជាមួយនេះ សម្តេច កិត្តិព្រឹទ្ធបណ្ឌិត បានប្រគេនថវិកា ដែលបានមកពីសទ្ធាជ្រះថ្លារបស់ សម្តេច អគ្គមហាសេនាសេនាបតីតេជោ និងសម្តេចកិត្តិព្រឹទ្ធបណ្ឌិតផ្ទាល់ រួមជាមួយថវិការបស់ឯកឧត្តមលោកជំទាវជាពុទ្ធបរិស័ទ ចូលរួមចាប់មគ្គផល ក្នុងឱកាសថ្ងៃបុណ្យចូលព្រះវស្សនេះចំនួន១ម៉ឺនដុល្លារ និង២០លានរៀល ប្រគេនសម្តេចព្រះពោធិវង្សកិត្តិបណ្ឌិត អំលឹមហេង សម្តេចព្រះសង្ឃនាយករងទី១ នៃព្រះរាជាណាចក្រកម្ពុជា តម្កល់ទុកប្រើប្រាស់ក្នុង វិស័យព្រះពុទ្ធសាសនា និងបានបវរណាប្រគេន សម្តេចព្រះពោធិវង្សកិត្តិបណ្ឌិត អំលឹមហេង សាដក១ និងបច្ច័យ៣លានរៀល ព្រះសង្ឃគង់អមចំនួន៦អង្គ ក្នុងអង្គនីមួយៗសាដក១ និងបច្ច័យ២លានរៀល និងព្រះសង្ឃចំនួន២៣០អង្គ ផ្សេងទៀត ដែលគង់ចាំព្រះវស្សាក្នុងទីអារាមនេះដែរក្នុង១អង្គៗ បច្ច័យ៥ ម៉ឺនរៀល។

បន្ទាប់ពី សម្តេចព្រះពោធិវង្សកិត្តិបណ្ឌិត អំ លឹមហេង និងព្រះថេរានុថេររះគ្រប់ព្រះអង្គសូត្រពហុទេវាទទួល យកនូវទៀនវស្សា គ្រឿងឧបភោគ បរិភោគ ភេសជ្ជៈ និងបច្ច័យ ដែលសម្តេច អគ្គមហាសេនាបតីតេជោ ហ៊ុនសែន និងសម្ដេចកិត្តិព្រឹទ្ធបណ្ឌិតប៊ុនរ៉ានីហ៊ុនសែន,ក្រុមគ្រួសារ និងឯកឧត្តមលោកជំទាវ ជាពុទ្ធសាសនិកវេរប្រគេនក្នុងថ្ងៃនេះរួចមក សម្តេចកិត្តិព្រឹទ្ធបណ្ឌិត ព្រមទាំងលោកជំទាវ អមដំណើរទាំងអស់ បានអញ្ជើញអុចទៀនវស្សានៅក្នុងមហាកុដិ ជាកិច្ចចាប់ផ្តើមរដូវកាលចូលវស្សារយៈពេល៣ខែ ដោយចាប់ផ្តើមពីថ្ងៃ១រោចខែទុតិយាសាឍនេះតទៅ។