ជើងហោះហើរបានចាប់ផ្ដើមដំណើរការឡើងវិញហើយ នៅឯអាកាសយានដ្ឋានអន្តរជាតិតាកស៊ីង (Daxing) ក្នុងក្រុងប៉េកាំង នៅថ្ងៃពុធ (ទី២ ខែសីហា) នេះ បន្ទាប់ពីមានភ្លៀងធ្លាក់ខ្លាំងជាច្រើនថ្ងៃ ដែលបណ្តាលឲ្យមានការផ្អាកបណ្ដោះអាសន្ន។

ខាងអាកាសយានដ្ឋាន បានឲ្យដឹងថា ការហោះហើរសរុបចំនួន ៩០៣ជើង នឹងត្រូវបានដំណើរការដូចដែលបានគ្រោងទុក នៅថ្ងៃពុធនេះតែមួយគត់ ហើយក៏បានប្រាប់ដែរថា ខ្លួននឹងយកចិត្តទុកដាក់លើការទាមទាររបស់អ្នកដំណើរ និងផ្តល់សេវាកម្ម ដើម្បីធ្វើឲ្យប្រាកដថា អ្នកដំណើរនឹងមានការហោះហើរយ៉ាងរីករាយ និងសុវត្ថិភាព។ ជាមួយគ្នានេះ អាកាសយានដ្ឋានក៏នឹងតាមដានយ៉ាងដិតដល់ផងដែរនូវជំនន់ទឹកភ្លៀង ដើម្បីធានាឲ្យការហោះហើរឡើងវិញ ប្រព្រឹត្តទៅដោយរលូន។

គិតត្រឹមម៉ោង ២២:០០ ថ្ងៃចន្ទ ទីក្រុងប៉េកាំងបានជួបប្រទះនឹងការធ្លាក់ភ្លៀងរយៈពេល ៥០ម៉ោងឥតឈប់ឈរ ហើយទិន្នន័យបានបង្ហាញថា ចាប់ពីម៉ោង ២០:០០ ថ្ងៃសៅរ៍ ដល់ម៉ោង ២២:០០ ថ្ងៃចន្ទ ទីក្រុងប៉េកាំង មានភ្លៀងធ្លាក់ជាមធ្យម ២៣៦.៣មីលីម៉ែត្រ ជាមួយនឹងទឹកភ្លៀងអតិបរមាលើសពី ៦៩០មីលីម៉ែត្រ នៅឯកន្លែងមានទេសភាពខៀវស្រងាត់មួយ ក្នុងតំបន់ម៉ិនថូវហ្កូ (Mentougou)៕