នាយករដ្ឋមន្ត្រីអង់គ្លេសលោក Rishi Sunak នៅថ្ងៃពុធ (ទី២ ខែសីហា) នេះ បាននិយាយការពារការសម្រេចចិត្តរបស់រដ្ឋាភិបាលរបស់លោក ក្នុងការចុះហត្ថលេខាលើអាជ្ញាប័ណ្ណប្រេង និងឧស្ម័នថ្មីជាងមួយរយច្បាប់ ទោះបីជាមានការរិះគន់ពីអ្នកធ្វើយុទ្ធនាការអាកាសធាតុក៏ដោយ។

ដោយនិយាយនៅក្នុងកិច្ចសន្ទនាទូរស័ព្ទតាមវិទ្យុ LBC លោក Sunak បាននិយាយថា កំណត់ត្រាអាកាសធាតុរបស់ចក្រភពអង់គ្លេស គឺល្អជាងប្រទេសទាំងអស់ នៅក្នុងក្រុមប្រទេស G7។

ចក្រភពអង់គ្លេស កាលថ្ងៃចន្ទ ទី៣១ ខែកក្កដា បានផ្តល់អាជ្ញាប័ណ្ណថ្មី សម្រាប់ការទាញយកប្រេង និងឧស្ម័ន នៅសមុទ្រខាងជើង ដែលជាផ្នែកនៃកិច្ចប្រឹងប្រែង ដើម្បីក្លាយជាប្រទេសឯករាជ្យលើផ្នែកថាមពល។

ចក្រភពអង់គ្លេសមានគោលដៅ ដើម្បីឈានដល់ការបំភាយឧស្ម័នសូន្យ នៅឆ្នាំ២០៥០ ប៉ុន្តែលោក Sunak បាននិយាយថា សូម្បីតែត្រឹមពេលនេះ ប្រទេសនេះ ត្រូវបានគេរំពឹងថា នឹងទទួលបានច្រើនជាងមួយភាគបួននៃថាមពលរបស់ខ្លួនពីប្រេង និងឧស្ម័ន។

លោកនិយាយថា ឥន្ធនៈហ្វូស៊ីលក្នុងស្រុកថ្មី នឹងជួយធ្វើឲ្យសន្តិសុខថាមពលប្រសើរឡើង និងកាត់បន្ថយការពឹងផ្អែកលើរដ្ឋផ្សេងៗ ដូចជារុស្ស៊ីជាដើម៕