ឧត្ដរមានជ័យ៖ រដ្ឋបាលខេត្តឧត្ដរមានជ័យ បានប្រកាសពីការរកឃើញពលករខ្មែរ ១២នាក់ បានឆ្លងមេរោគកូវីដ-១៩ បន្ទាប់ពីពួកគេវិលត្រឡប់មកពីប្រទេសថៃ។
ក្នុងសេចក្ដីប្រកាសព័ត៌មាននៅថ្ងៃនេះ រដ្ឋបាលខេត្តឧត្ដរមានជ័យបញ្ជាក់ថា ពលការិនីខ្មែរម្នាក់អាយុ ៣៤ឆ្នាំ ដែលមានស្រុកកំណើតនៅខេត្តព្រៃវែង ត្រូវបានរកឃើញឆ្លងមេរោគកូវីដ-១៩ ក្រោយពេលធ្វើដំណើរឆ្លងដែនវិលត្រឡប់ពីខេត្តសមុទ្រប្រាកាន ប្រទេសថៃ ចូលមកដល់កម្ពុជាវិញតាមច្រកព្រំដែនអន្តរជាតិអូរស្មាច់កាលពីថ្ងៃម្សិលមិញនេះ។
រដ្ឋបាលខេត្តនេះបញ្ជាក់ថា ពលការិនីរូបនេះ ត្រូវបានបញ្ជូនទៅដាក់ឱ្យស្ថិតក្រោមការព្យាបាលនៅមន្ទីរពេទ្យបង្អែកខេត្តហើយ ហើយប្ដីរបស់គាត់ និងអ្នករួមដំណើរម្នាក់ទៀត ត្រូវបានបញ្ជូនទៅដាក់មណ្ឌលចត្តាឡីស័ក។
សម្រាប់ថ្ងៃ២០ឧសភានេះវិញ រដ្ឋបាលខេត្តឧត្ដរមានជ័យបញ្ជាក់ថា បានរកឃើញពលករខ្មែរ ១១នាក់ទៀតឆ្លងមេរោគកូវីដ-១៩ បន្ទាប់ពីពួកគេវិលត្រឡប់មកពីខេត្តសមុទ្រប្រាកានដែរ ហើយឆ្លងតាមច្រកព្រំដែនអន្តរជាតិអូរស្មាច់ចូលមកកម្ពុជានៅថ្ងៃនេះ។
រដ្ឋបាលខេត្តនេះ ឱ្យដឹងថា ពលករខ្មែរទាំង ១១នាក់នេះ ក្នុងនោះមានស្ត្រី ០៧នាក់ផងដែរ ត្រូវបានបញ្ជូនទៅព្យាបាលនៅមន្ទីរពេទ្យបង្អែកខេត្តហើយ។
ខេត្តឧត្ដរមានជ័យបញ្ជាក់ថា ខេត្តនេះរកឃើញមនុស្សសរុប ២២នាក់ បានឆ្លងមេរោគកូវីដ-១៩ ក្នុងនោះ ២០នាក់សុទ្ធតែជាពលករវិលត្រឡប់មកពីប្រទេសថៃ ហើយមនុស្ស ០២នាក់ទៀត បានពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ ប៉ុន្តែ អ្នកជំងឺកូវីដ-១៩ចំនួន ០៣នាក់ហើយ ត្រូវបានព្យាបាលជាសះស្បើយ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
