បាល់ទាត់៖ ការប្រកួតកីឡាបាល់ទាត់ជម្រើសជើងឯកជាតិ ២០២១ រឺមិត្តហ្វូនខាំបូឌានលីគ សប្ដាហ៍នេះលេងបង្គ្រប់សប្ដាហ៍ទី៣ ដែលសរុបទាំងអស់មានប្រាំប្រកួត ខណៈមួយប្រកួតដំបូងនៃសប្តាហ៍នេះបានបញ្ចប់ការប្រកួត ដោយអាស៊ីអឺរ៉ុបចាញ់កងយោធពលខេមរភូមិន្ទ ១ទល់នឹង២ កាលពីខែមិនាកន្លងទៅ។
ថ្ងៃសៅរ៍នេះ ក្លិបបាល់ទាត់មកពីខេត្តស្វាយរៀងព្រះខ័នរាជ ត្រូវធ្វើដំណើរទៅកាន់ទឹកដី Prince ដើម្បីជួបជាមួយម្ចាស់ពានរង្វាន់សម្តេចតេជោ ២០២០ វិសាខា។ ប្រកួតនេះលេងនៅម៉ោង ៣និង៣០នាទីរសៀល ហើយមានការផ្សាយផ្ទាល់តាមទូរទស្សន៍ BTV News។ ក្លិបជើងឯករងព្រះខ័នរាជស្វាយរៀង បានបញ្ចប់បីប្រកួតហើយឈ្នះទាំងបី ឈ្នះអគ្គិសនីកម្ពុជា ៦ទល់នឹង១, ឈ្នះណាហ្កាវើលដ៍ ៣ទល់នឹង១ និងវាយបកតាមពីក្រោយឈ្នះអាស៊ីអឺរ៉ុប ៤ទល់នឹង៣ ក្រៅដី។ ពេលនេះព្រះខ័នរាជឈរនៅចំណាត់លេខ២ ក្នុងតារាងជើងឯក។ កីឡាករប្រាក់ មុន្នី ឧត្តម និងកីឡាករ ជា ណាង បានប្រាប់ឱ្យដឹងស្រដៀងគ្នាថា រូបគេពិតជាសប្បាយចិត្ត និងទន្ទឹងរង់ចាំការប្រកួតមកដល់។ សម្រាប់ការប្រកួតជាមួយវិសាខា កីឡាករូបនេះគិតថាជាការប្រកួតដ៏សំខាន់ និងប្រឹងប្រែងអោយអស់ពីសមត្ថភាព។ គ្រូបង្វឹកព្រះខ័នរាជស្វាយរៀង លោក Conor Nester ប្រាប់ដែរថា ពូកយើងពិតជារីករាយដែលបានត្រឡប់មកវិញ និងមិនអាចទន្ទឹងរង់ចាំការប្រកួតដំបូងរបស់យើងថ្ងៃទី២២ ខែឧសភាជាមួយវិសាខា។ លោកបន្តថា យើងត្រៀមរួចរាល់សម្រាប់ការប្រកួតចុងសប្តាហ៍នេះ។ តែមិនសប្បាយចិត្តដែលការប្រកួតលេងនៅម៉ោង ៣និង៣០នាទីរសៀល។
វិសាខាទើបឆ្លងកាត់ ២ប្រកួតឈរនៅចំណាត់ថ្នាក់លេខ១០ មាន ២ពិន្ទុក្រោយស្មើទាំងពីរប្រកួត ស្មើកងយោធពលខេមរភូមិន្ទ ០ទល់នឹង០ និងស្មើនគរបាលជាតិ ១ទល់នឹង០ សប្តាហ៍កន្លងទៅនេះ។ កីឡាករខ្សែប្រយុទ្ធ Macus Haber បញ្ជាក់ថា ចំពោះការប្រកួតចុងសប្តាហ៍នេះមិនមានអ្វីខុសប្លែកពីការប្រកួតរាល់ដងទេ ចំពោះមុខយើងចង់បានជ័យជំនះ។ សូមជម្រាបជូនថា ៦ប្រកួតចុងក្រោយទាំងក្នុងពានរង្វាន់សម្តេចតេជោ និងលីគកំពូលគិតចាប់ពីឆ្នាំ២០១៨ ដល់២០២០ ព្រះខ័នរាជស្វាយរៀងឈ្នះ ៤ដង និងស្មើ ២ដង។ ថ្ងៃជាមួយគ្នានេះដែរ ក្លិបជើងឯកលីគកំពូល ៦សម័យ ភ្នំពេញក្រោនបើកទ្វារស្វាគមន៍អ្នកចំណូលថ្មីព្រៃវែង វេលាម៉ោង ៦និង០០នាទីល្ងាច និងមានការផ្សាយផ្ទាល់ពី BTV News ដែរ។ នេះជាលើកដំបូងដែលក្រុមទាំងពីរជួបគ្នាក្នុងលីគកំពូល ប៉ុន្តែរដូវកាលមុន ព្រៃវែងឈ្នះភ្នំពេញក្រោន ២ទល់នឹង៤ ដណ្តើមបានចំណាត់ថ្នាក់លេខ៣ ពានរង្វាន់សម្តេចអគ្គមហាសេនាបតីតេជោ ហ៊ុន សែនថ្នាក់ជាតិ។ ជំនួបនេះត្រូវបានអ្នកគាំទ្របាល់ទាត់ចាត់ទុកជាការប្រកួតសងសឹង។
កីឡាករប្រេស៊ីល Matheus Silva បានលើកឡើងថា គេក៏ដូចជាមិត្តរួមក្រុមរីករាយដែលលីគកំពូលបន្តការប្រកួតវិញ និងចង់ឱ្យការប្រកួតមកដល់ឆាប់ៗ។ ចំពោះការប្រកួតជាមួយព្រៃវែង កីឡាករទាំងអស់ស្ថិតក្នុងស្ថានភាពល្អ រៀបចំបានល្អ ហើយសង្ឃឹមថា ធ្វើបានល្អរាល់ការប្រកួតទាំងអស់ដើម្បី ៣ពិន្ទុ។ ភ្នំពេញក្រោនបានដំណើរ ៣ប្រកួតហើយ ឈ្នះទាំង ៣ប្រកួតដោយយកឈ្នះក្លិបសូលទីឡូអង្គរ ៧ទល់នឹង១, ឈ្នះគីរីវង់សុខសែនជ័យ ២ទល់នឹង១ និងឈ្នះបឹងកេត ២ទល់នឹង១ ឈរនៅចំណាត់ថ្នាក់លេខ៣ មាន ៩ពិន្ទុដូចព្រះខ័នរាជស្វាយរៀងដែរ។ ចំនែកខេត្តព្រៃវែង ៣ប្រកួត ស្មើអង្គរថាយហ្គឺរ ១ទល់នឹង១, ចាញ់គីរីវង់សុខសែនជ័យ ០ទល់នឹង៣ និងថ្មីនេះឈ្នះសូលទីឡូអង្គរ ៦ទល់នឹង០។ នៅទឹកដី SRU ខេត្តសៀមរាបថ្ងៃសៅរ៍នេះដែរ ក្លិបសូលទីឡូអង្គរត្រូវទទួលក្លិបមកពីខេត្តតាកែវ គីរីវង់សុខសែនជ័យ ម៉ោង ៣និង៣០នាទីរសៀល។ គ្រូបង្វឹកគីរីវង់បញ្ជាក់ថា ពូកយើងពិតជារីករាយដែលការប្រកួតត្រឡប់មកវិញ បន្ទាប់ពីផ្អាកមួយរយៈ។ លោកបន្តថា ក្នុងនាមជាគ្រូបង្វឹកអ្វីដែលកាន់តែរីករាយនោះ គឺកីឡាករទាំងអស់បានរក្សានូវកម្លាំង ស្មារតី និងត្រៀមលក្ខណៈបានល្អសម្រាប់ប្រកួតជាមួយក្រុមសូលទីឡូអង្គរ។
ឆ្លងកាត់ ៤ប្រកួត គីរីវង់សុខសែនជ័យឈ្នះ ២ប្រកួត និងចាញ់ ២ប្រកួត មាន ៦ពិន្ទុក្នុងនោះឈ្នះអាស៊ីអឺរ៉ុប ៤ទល់នឹង២ និងឈ្នះខេត្តព្រៃវែង ៣ទល់នឹង០ តែចាញ់ភ្នំពេញក្រោន ១ទល់នឹង២ និងចាញ់អង្គរថាយហ្គឺរ ០ទល់នឹង២។ ឯសូលទីឡូអង្គរ ៣ប្រកួតចាញ់ទាំង៣ ចាញ់ភ្នំពេញក្រោន កងយោធពលខេមរភូមិន្ទ និងចាញ់ខេត្តព្រៃវែង។ ៤ប្រកួតចុងក្រោយដែលក្រុមទាំងពីរជួបគ្នា គីរីវង់សុខសែនជ័យឈ្នះពីរប្រកួត ស្មើមួយប្រកួត និងចាញ់មួយប្រកួត។ សម្រាប់ការប្រកួទថ្ងៃអាទិត្យនេះមាន ២ប្រកួតក្នុងនោះ អង្គរថាយហ្គឺរត្រូវស្វាគមន៍អ្នកការពារតំណែងជើងឯកបឹងកេត វេលាម៉ោង ៣និង៣០នាទីរសៀលនៅកីឡដ្ឋាន SRU ខេត្តសៀមរាប ខណៈដែលនគរបាលជាតិទទួលណាហ្កាវើល នៅទីលានថ្មីរបស់ខ្លួន 7NG។ ពេលនេះអង្គរថាយហ្គឺរកំពូលឈរនៅកំពូលតារាងជើងឯកបាល់ទាត់ជាតិ ៤ប្រកួតមាន ១០ពិន្ទុ ឈ្នះ៣ និងស្មើ១ ក្នុងនោះឈ្នះគីរីវង់សុខសែនជ័យ ២ទល់នឹង០, ឈ្នះនគរបាលជាតិ ១ទល់នឹង០ និងឈ្នះកងយោធពលខេមរភូមិន្ទ ៣ទល់នឹង២ ខណៈស្មើខេត្តព្រៃវែង ១ទល់នឹង១។ កីឡាករ ឡុង ភារ៉ាត់ និយាយថា ការត្រឡប់មកហាត់វិញក្នុងសប្ដាហ៍នេះ ពួកយើងមានភាពប្រសើរច្រើនទាំងកម្លាំង បច្ចេកទេស និងការយល់ចិត្តគ្នាជាដើម ឥឡូវនេះពួកយើងកំពុងតែរៀបចំ និងត្រៀមខ្លួនឲ្យបានល្អបំផុតសម្រាប់ការប្រកួតថ្ងៃទី២៣ នេះ។
កីឡាករសញ្ជាតិជប៉ុន Kosuke Uchida ក៏បានលើកឡើងដែរថា គេពិតជារីករាយដែលបានលេងទល់នឹងក្រុមបឹងកេតម្ដងទៀត ក្នុងនាមជាកីឡាកររបស់អង្គរថាយហ្គឺរ។ វាប្រហែលជាការចាប់ផ្ដើមមិនល្អរបស់ពួកគេ ប៉ុន្តែជាការពិតណាស់ ពួកគេនៅតែជាក្រុមដ៏ល្អមួយដែលគ្រប់គ្នាតែងស្គាល់។ ពួកយើងកំពុងផ្ដោតលើខ្លួនយើងផ្ទាល់នូវអ្វីដែលពួកយើងត្រូវធ្វើ ហើយពួកយើងរៀបចំបានល្អ។ កីឡាកររូបនេះបន្តថា យើងត្រូវតែលេងឲ្យអស់ពីសម្ថភាពនៅលើទីលាន ដើម្បីទទួលជ័យជម្នះ។ ជាចុងក្រោយអរគុណទៅដល់អ្នកគ្រប់គ្នាដែលគាំទ្រពួកយើង។ ពួកយើងពិតជារីករាយដែលអាចលេងបាល់ទាត់ ក្នុងស្ថានភាពដ៏លំបាកនេះបាន។ ចំនែកក្លិបបឹងកេត ២ប្រកួតដំបូងលេងមិនបានល្អទេ ដោយភ្លាត់ចាញ់ក្លិបណាហ្កាវើលដ៍ ០ទល់នឹង១ និងចាញ់ភ្នំពេញក្រោន ១ទល់នឹង២ ក្នុងដី។ លោក គីម ភក្តី គ្រូបង្វឹកបឹងកេតធ្លាប់បញ្ជាក់ថា ទិសដៅយើងគឺដាច់ខាតត្រូវតែឈ្នះការប្រកួតទាំងនេះ នេះជាអ្វីដែលយើងត្រូវធ្វើ ហើយយើងនឹងជំនះគ្រប់ស្ថានភាពទាំងអស់ប្រឹងប្រែងឱ្យអស់ពីសមត្ថភាព។
ប្រាំប្រកួតចុងក្រោយគិតចាប់ពីខែកញ្ញា ឆ្នាំ២០១៨ ក្រុមទាំងពីរមានការប្រកួតដ៏ស្វិតស្វាញស្មើគ្នាទាំងអស់ គ្មានអ្នកចាញ់ រឺអ្នកឈ្នះ។ ដោយឡែកក្លិបណាហ្កាវើលដ៍ ៤ប្រកួត ឈ្នះ២ ស្មើ១ និងចាញ់១ មាន ៧ពិន្ទុ ក្នុងនោះឈ្នះបឹងកេត និងអគ្គិសនីកម្ពុជា និងស្មើកងយោធពលខេមរភូមិន្ទ ២ទល់នឹង២ ប៉ុន្តែចាញ់ព្រះខ័នរាជស្វាយរៀង ១ទល់នឹង៣។ នគរបាលជាតិ ៤ប្រកួត ទើបតែរកបាន ១ពិន្ទុទេបន្ទាប់ពីស្មើវិសាខា ១ទល់នឹង១ កន្លងទៅនេះ ផ្ទុយទៅវិញ ៣ប្រកួតចាញ់អគ្គិសនីកម្ពុជា, អាស៊ីអឺរ៉ុប និងចាញ់អង្គរថាយហ្គឺរ។ ប្រាំប្រកួតចុងក្រោយគិតចាប់ពីឆ្នាំ២០១៨ នគរបាលជាតិមិនដែលឈ្នះណាហ្កាវើលដ៍ម្តងណាទេ។ បាល់ទាត់លីគកំពូលកម្ពុជា ក្នុងខែឧសភា ដោយមិនគិតការប្រកួតចុងសប្ដាហ៍នេះ នៅសល់ពីរប្រកួតទៀតថ្ងៃពុធទី២៦ ខែឧសភា បង្គ្រប់សប្ដាហ៍ទី៤ បន្ទាប់មកនឹងសម្រាករហូតដល់ដើមខែកក្កដា ដោយសារក្រុមបាល់ទាត់ជម្រើសជាតិកម្ពុជាក្នុងខែមិថុនា ត្រូវលេងជម្រុះបាល់ទាត់ពិភពលោក ៣ប្រកួតនៅសល់៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
