ប្រធានាធិបតីអ៊ុយក្រែនលោក Volodymyr Zelenskiyនិយាយថា លោកសង្ឃឹមថា កិច្ចប្រជុំកំពូលស្វែងសន្តិភាពអ៊ុយក្រែនអាចនឹងធ្វើឡើងនៅក្នុងរដូវស្លឹកឈើជ្រុះខាងមុខនេះ ហើយកិច្ចប្រជុំក្នុងសប្តាហ៍នេះនៅប្រទេសអារ៉ាប៊ីសាអូឌីត បានបោះជំហានដ៏រឹងមាំឆ្ពោះទៅកាន់គោលដៅនោះ ។

 លោក Zelenskiyនិយាយប្រាប់ក្រុមមន្រ្តីការទូតអ៊ុយក្រែនក្នុងសុន្ទរកថាចុះផ្សាយនៅលើវែបសាយប្រធានាធិបតីថា ប្រទេសជិត ៤០ នឹងតំណាងកិច្ចប្រជុំនៅទីក្រុង Jeddah របស់ប្រទេសអារ៉ាប៊ីសាអូឌីត ចាប់ពីថ្ងៃទី ៥ ដល់ថ្ងៃទី ៦ខែសីហា ។

 លោក Zelenskiyនិងក្រុមការងាររបស់លោក កំពុងធ្វើការជាមួយសម្ព័ន្ធមិត្ត ដើម្បីបង្កើតការគាំទ្រធំទូលាយសម្រាប់កិច្ចប្រជុំកំពូលសន្តិភាព ដែលនឹងគាំទ្រគោលការណ៍ជាច្រើនបង្កើតដំណោះស្រាយបញ្ចប់សង្រ្គាម ដែលបានចាប់ផ្តើមដោយសារតែការវាយលុកទ្រង់ទ្រាយធំរបស់រុស្ស៊ីកាលពីរយៈពេលជិត ១៨ខែមុន ។

 ចក្ខុវិស័យរបស់លោក Zelenskiy សម្រាប់ការអំពាវនាវស្វែងរកសន្តិភាព គឺដើម្បីស្តាឡើងវិញទាំងស្រុងបូរណភាពទឹកដីអ៊ុយក្រែន និងការដកទាហានទាំងអស់របស់រុស្ស៊ី ការការពារសន្តិសុខស្បៀង និងថាមពល សុវត្ថិភាពនុយក្លេអ៊ែរ ក៏ដូចជាការដោះលែងអ្នកទោសទាំងអស់ និងចំណុចសំខាន់ៗដទៃជាច្រើនទៀត ។

 លោក Zelenskiyនិយាយថា នេះគឺជាជំនួបលើកទី ៤ ហើយប្រទេសជិត ៤០នឹងចូលរួមកិច្ចប្រជុំនេះ ។ ជំនួបលើកទី ១ បានរៀបចំឡើងនៅក្នុងទីក្រុង Copenhagen ប្រទេសដាណឺម៉ាក ហើយជំហានទី ៣ នឹងក្លាយជាការរៀបចំជំនួបកំពូល គឺកិច្ចប្រជុំកំពូលសន្តិភាពសកល៕