ជឺជិតស៊ូ៖ បន្ទាប់ពីខកខានឡើងសង្វៀន Who Number One កាលពីចុងខែមេសាកន្លងទៅ ដោយសាររបួសជង្គង់ កីឡាការិនីជឺជិតស៊ូជម្រើសជាតិកម្ពុជា ខាន់ ចេសា នឹងត្រូវឡើងសង្វៀនលំដាប់កំពូលនេះជាថ្មី ដោយត្រូវជួបកីឡាករជើងខ្លាំងប្រេស៊ីល Pati Fontes ក្នុងប្រភេទទម្ងន់ស្រាលនាថ្ងៃទី២៨ ខែឧសភា ឆ្នាំ២០២១ ខាងមុខនេះ នៅរដ្ឋតិចសាស សហរដ្ឋអាមេរិក។
នេះគឺជាការប្រកួតដ៏ទាក់ទាញដែលរៀបចំដោយ FloGrappling ដ្បិតកីឡាការិនីជើងខ្លាំងទាំងពីរទើបបញ្ចប់ការប្រកួតកម្រិតពិភពលោក នៃព្រឹត្តិការណ៍ជើងឯកអាមេរិក២០២១ នៅមជ្ឈមណ្ឌលកីឡា NYTEX នារដ្ឋតិចសាសកាលពីចុងសប្ដាហ៍កន្លងទៅ ដោយកីឡាការិនីកូនកាត់ខ្មែរ-អាមេរិក-ម៉ិចស៊ិក ខាន់ ចេសា ទទួលបានចំណាត់ថ្នាក់លេខ៣ ខណៈ Fontes ទទួលបានលេខ៤ ក្រោយបរាជ័យក្នុងវគ្គពាក់កណ្ដាលផ្ដាច់ព្រ័ត្រដូចគ្នា។ នេះគឺជាការប្រកួតលើកទី២ លើសង្វៀន Who Number One របស់ម្ចាស់មេដាយមាសកីឡាអាស៊ី និងស៊ីហ្គេម ខាន់ ចេសា បន្ទាប់ពីបានផ្ដួលកីឡាការិនី Danielle Kelly យ៉ាងងាយស្រួលកាលពីដើមឆ្នាំកន្លងទៅ។ ប៉ុន្ដែប៉ះ Fontes ចុងខែនេះ គេជឿថា មិនមែនជារឿងងាយសម្រួលសម្រាប់អ្នកប្រយុទ្ធវ័យ ១៩ឆ្នាំឡើយ ព្រោះអ្នកទាំងពីរមានទេពកោសល្យល្អ និងធ្លាប់ដណ្ដើមបានសមិទ្ធផលធំៗប្រហាក់ប្រហែលគ្នាលើឆាកអន្ដរជាតិ។ អ្វីដែលៗគួរចាប់អារម្មណ៍ នេះក៏ជាជំនួបសងសឹកផងដែរ ព្រោះ ខាន់ ចេសា ធ្លាប់ប្រកួតចាញ់កីឡាការិនីវ័យ ៣៣ឆ្នាំ Fontes ម្ដងរួចមកហើយកាលពីឆ្នាំ២០១៦។
យ៉ាងណាមិញជំនួបលើកនេះ ត្រូវបានអ្នកជំនាញកីឡាជឺជិតស៊ូអន្តរជាតិបង្ហាញសុទិដ្ឋិនិយមថា ខាន់ ចេសា មានប្រៀបជាង Fontes ព្រោះនាងនៅវ័យក្មេងមានកម្លាំង និងបច្ចេកទេសល្អ ខណៈបទពិសោធន៍ប្រកួតមិនចាញ់ Fontes នោះទេ ពោលគឺមិនដូចកាលពួកគេជួបគ្នាលើកទី១ ឡើយ។ គួរដឹងថា សង្វៀន Who Number One គឺជាកម្មវិធីប្រកួតដ៏ធំមួយនៅអាមេរិក ដែលតែងផ្គូផ្គងកីឡាករ-កីឡាការិនីជើងខ្លាំងលើពិភពលោកជួបគ្នា ក្នុងនោះក៏មានវត្តមានកីឡាការិនីជើងខ្លាំងវ័យក្មេង ខាន់ ចេសា ផងដែរ។ កាលពីថ្ងៃទី៣០ ខែមេសាកន្លងទៅ ចេសា ត្រូវបានផ្គូផ្គងឲ្យជួបកីឡាការិនីអាមេរិក Grace Gundrum តែដោយសាររបូសជង្គង់អំឡុងពេលហ្វឹកហាត់ នាងក៏សម្រេចចិត្តដកខ្លួនពីការប្រកួតវិញ មុនស្ថាប័ន FloGrappling ផ្គូផ្គងជាថ្មី ដោយត្រូវជួបគូសត្រូវចាស់កីឡាការិនី Pati Fontes នាចុងខែនេះតែម្ដង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
