​អាមេរិក​៖ មន្ត្រី​ជាន់ខ្ពស់​របស់​រដ្ឋាភិបាល​អាមេរិក​និយាយ​ថា រដ្ឋបាល​លោក​ប្រធានាធិបតី Joe Biden មាន​ចេតនា​កសាង​កិច្ចព្រមព្រៀង​ឆ្នាំ​២០១៨ នៅ​សិង្ហ​បុរី ក្នុង​គោលនយោបាយ​របស់​ខ្លួន​ចំពោះ​កូរ៉េខាងជើង​។​

​មន្ត្រី​រូប​នេះ​បាន​ថ្លែង​ក្នុង​អំឡុង​សន្និសីទ​តាម ​Video កាលពី​ថ្ងៃ​ពុធ​។ រដ្ឋបាល​លោក ​Biden នៅ​ពេល​ថ្មីៗ​នេះ​បាន​បញ្ចប់​ការពិនិត្យ​ឡើងវិញ​ នៃ​គោលនយោបាយ​សហរដ្ឋអាមេរិក​លើ​កូរ៉េខាងជើង​។​ មន្ត្រី​ជាន់​ខ្ពស់​រូប​នោះ​បាន​និយាយ​ថា គោលនយោបាយ​របស់​រដ្ឋ​បាល​នេះ មាន​គោល​បំណង​ចរចា​តាម​ផ្លូវ​ការទូត​ជាមួយ​កូរ៉េខាងជើង ដើម្បី​បង្កើត​ដំណើរការ​រីកចម្រើន​ជាក់ស្ដែង ​ដែល​បង្កើន​ផ្នែក​សន្តិសុខ​សម្រាប់​សហរ​ដ្ឋ​អាមេរិក​។​ មន្ត្រី​ដដែល​បាន​បន្ថែម​ថា ទីក្រុង Washington នឹង​កសាង​កិច្ចព្រមព្រៀង​សិង្ហ​បុរី​ឆ្នាំ​២០១៨ និង​កិច្ចការ​ផ្សេងទៀតដែល​ត្រូវ​បាន​បង្កើត​ឡើង​ដោយ​រដ្ឋបាល​ចាស់​។​

​កិច្ចព្រមព្រៀង​នៅ​ប្រទេស​សិង្ហ​បុរី ​ត្រូវ​បាន​ឈាន​ដល់​រវាង​អតីត​ប្រធានាធិបតី​អាមេរិក Donald Trump និង​មេដឹកនាំ​កូរ៉េខាងជើង Kim Jong Un អំឡុង​ជំនួប​កំពូល​អាមេរិក-កូរ៉េខាងជើង​។ ​លោក Trump បាន​ធានា​ថា ​សហរដ្ឋអាមេរិក​នឹង​មិន​ព្យាយាម​ផ្លាស់ប្ដូរ​របប​នៅ​កូរ៉េខាងជើង​ទេ។ លោក Kim បាន​បញ្ជាក់​ថា ​លោក​នឹង​ធ្វើការ​ឆ្ពោះ​ទៅ​រក​ការរំសាយ​ អាវុធ​នុយក្លេអ៊ែរ​ទាំងស្រុងនៅ​ឧបទ្វីប​កូរ៉េ​ទេ​។​ ​នៅ​ថ្ងៃ​សុក្រ​នេះ លោក​ប្រធានាធិបតី Biden គ្រោង​នឹង​ជួប​ជាមួយ​លោក​ប្រធានាធិបតី​កូរ៉េខាងត្បូង Moon Jae-in និង​ពិភាក្សា​ពី​បញ្ហា​កូរ៉េខាងជើង​៕

អត្ថបទ៖ សុខមាន