​ប្រណាំង​កង់៖ ​កីឡាករ​អ៊ីតាលី Andrea Vendrame បាន​ប្រជែង​ឈ្នះ​ដំណាក់កាល​ទី ១២ នៃ​ការ​ប្រកួត​ប្រណាំង​កង់​ព្រឹត្តិការណ៍ Grand Tour, Giro d’Italia ថ្ងៃ​ព្រហស្បតិ៍​ម្សិលមិញ ខណៈ​អតីត​អ្នក​នាំមុខ​ពេល​ចាប់​ផ្តើម​ដំបូង Alessandro de Marchi មានការ​ប៉ះទង្គិច​។

​​ដំណាក់កាល​ទី ១២ ដែល​មាន​ចម្ងាយ​ផ្លូវ ២១២​គីឡូម៉ែត្រ កីឡាករ​របស់ Movistar, Marc Soler រួម​ជាមួយ Allesandro de Marchi និង​មិត្ត​រួម​ក្រុម Alex Dowsett សុទ្ធតែ​ក្នុងចំណោម​កីឡាករ​ដែល​មាន​ការ​ប៉ះ​ទង្គិច ​និង​មិន​អាច​បញ្ចប់​ការប្រកួត​បាន​។ ​កីឡាករ​ម្ចាស់ផ្ទះ​អ៊ីតាលី Andrea Vendrame របស់​ក្រុម​ប្រណាំង AG2R-Citroen ជា​អ្នក​មកដល់​ទី​ព្រ័ត្រ​មុនគេ​ក្នុង​ដំណាក់​កាល​ទី ១២ នេះ​ចំណាយ​ពេល ៥​ម៉ោង ៤៣​នាទី ៤៨​វិនាទី តាម​ពីក្រោយ​ដោយ​កីឡាករ​អូទ្រីស Christ Hamilton ក្នុង​ថេរវេលា​ដូចគ្នា​ ខណៈ​លេខ​៣ គឺ​កីឡាករ​ណូ​វែ​ហ្ស៊ី​ឡង់ George Bennet យឺត​ជាង ១៥​វិនាទី​។​

​​យ៉ាង​ណាក្តី​ក្រោយ ១២ដំណាក់កាល​នេះ​កីឡាករ​កូ​ឡុំ​ប៊ី Egan Bernal អតីត​ជើងឯក Tour de France នៅតែជា​អ្នក​នាំ​មុខ​គេ​ក្នុង​តារាង​រួម​ដដែល ​មាន​វេលា​ចំណេញ​លើ​អ្នក​លេខ២ Aleksandr Vlasov របស់​ក្រុម Astana ៤៥​វិនាទី​ដដែល និង​លេខ​៣ ផ្លាស់ប្ដូរ​មក​ជា​កីឡាករ​អ៊ីតាលី Damiano Caruso របស់​ក្រុម Bahrain យឺត​ជាង ១​នាទី ១២​វិនាទី​។ ​សំរាប់​ដំណាក់កាល​ទី ១៣ ថ្ងៃនេះ​មាន​ចម្ងាយ​ផ្លូវ ១៩៨​គីឡូម៉ែត្រ ជា​ដំណាក់កាល​ប្រណាំង​លើ​ស្ថានភាព​ផ្លូវ​រាបស្មើ​ចេញពី Ravenna ឆ្ពោះ​ទៅ Verona ភាគ​ខាងជើង​ប្រទេស​អ៊ីតាលី​៕

​អត្ថបទ​៖​នាង សុភា​វុ​ធ