ក្រចេះ៖ អាជ្ញាធរខេត្តក្រចេះ បាននឹងកំពុងស្វះស្វែងរៀបចំទីទួលសុវត្ថិភាពបម្រុងទុកជាមុន ដើម្បីជម្លៀស ប្រជាពលរដ្ឋទៅស្នាក់នៅបណ្ដោះអាសន្ន ខណៈទឹកទន្លេកំពុងហក់ឡើង និងអាចបង្កការជន់លិចភូមិឋានប្រជាពលរដ្ឋ ។

លោក គង់ គឹមនី អភិបាលរង ទទួលបន្ទុកគ្រោះមហន្តរាយខេត្តក្រចេះ បានឱ្យដឹងថា ក្រុមការ ងារកំពុងពិនិត្យបង្កើតទីទួលសុវត្ថិភាព​ នៅក្នុងក្រុងស្រុកនានា ពិសេសតំបន់ដែលធ្លាប់ងាយ​រង​ហានិភ័យ ដើម្បីត្រៀមជម្លៀសប្រជាពលរដ្ឋ ​និងសត្វ ឆ្លើយតបទៅនឹងគ្រោះមហន្តរាយទឹកជំនន់ និងជំនន់ទឹកភ្លៀង ​ខណៈដែលស្ថានភាពទឹកទន្លេមេគង្គក្រចេះហក់ឡើងជាបណ្តើរៗដែរ ។

លោកបានឲ្យដឹងទៀតថា​ ដើម្បីកាត់បន្ថយហានិភ័យ​ និងឆ្លើយតបសង្គ្រោះបន្ទាន់គ្រោះមហន្តរាយ ដែលអាច​បង្កឡើងដោយសារទឹក​ទន្លេមេគង្គ ឬជំនន់ទឹកភ្លៀង រដ្ឋបាលខេត្ត បានធ្វើការណែនាំ​ដល់គណៈ កម្មាធិការគ្រប់គ្រងគ្រោះមហន្តរាយ ក្រុង-ស្រុកទាំង ៧ ត្រូវត្រៀមរៀបចំសម្អាតទីតាំង​ទួលសុវត្ថិភាព និង ទីទួលសាធារណៈ ដែលមានស្រាប់ ឲ្យបានរួចរាល់ជាមុន។ ត្រូវតាមដានពិនិត្យ ជាប្រចាំនូវមុខសញ្ញា គ្រោះថ្នាក់ ដែលអាចគំរាមកំហែងដល់ប្រជាពលរដ្ឋ ដូចជា ទឹកជំនន់ លង់ទឹក ខ្យល់កន្ត្រាក់ អគ្គិភ័យ រន្ទះ បាញ់ ជាដើម ។ ត្រូវធ្វើរបាយការណ៍ជូនលេខាធិការដ្ឋាន នៃគណៈកម្មាធិការគ្រប់គ្រងគ្រោះមហន្តរាយ ខេត្តជាប់ជាប្រចាំ ។លោកក៏បានជំរុញណែនាំដល់អាជ្ញាធរ និងសហគមន៍ ត្រូវថែរក្សាការពារ ​កាប់ឆ្ការព្រៃ និងបោស សម្អាតជុំវិញទីតាំងទួលសុវត្ថិភាព ​ជួសជុល ​និងកែលម្អទីតាំងទួល ​ដើម្បីបង្កលក្ខណៈងាយស្រួយ និង អនាម័យបរិស្ថាន ។

ចំពោះស្ថានភាពទឹកទន្លេមេគង្គក្រចេះ គិតមកដល់ពេលនេះ នៅស្ថានីយជលសាស្ដ្រក្រចេះ ទឹក មានកម្ពស់ ជាង១៧ម៉ែត្រ គឺហក់ឡើងលឿនជាងឆ្នាំ២០២២ដល់ទៅជិត៤ម៉ែត្រ ហើយកម្រិត​កម្ពស់ទឹក ប្រុងប្រយ័ត្ន គឺកម្រិតកម្ពស់២២ម៉ែត្រ ៕អត្ថបទ៖ សេង ម័រ