ប្រជាជនហៃទី កំពុងសម្តែងការសង្ស័យជុំវិញការការស្នើរបស់ប្រទេសកេនយ៉ា ដើម្បីដឹកនាំកងកម្លាំងនគរបាលអន្តរជាតិ ដែលមានគោលបំណងប្រយុទ្ធប្រឆាំងនឹងអំពើហិង្សារបស់ក្រុមក្មេងទំនើង ដែលបានញាំញីប្រទេសការាអ៊ីបមួយនេះ។

ពួកគេនិយាយថា ការរំលោភបំពានផ្លូវភេទ និងការផ្ទុះជំងឺអាសន្នរោគដ៏សាហាវ ដែលបានអមជាមួយកងកម្លាំងបរទេស ជាច្រើនទសវត្សរ៍កន្លងមកនេះ មិនបានជំរុញឲ្យមានទំនុកចិត្តច្រើននោះទេ។ ប៉ុន្តែជនជាតិហៃទី ក៏និយាយថា ការបង្ហូរឈាមដែលមិនអាចគ្រប់គ្រងនៅក្នុងប្រទេសរបស់ពួកគេ បន្សល់ទុកឲ្យពួកគេនូវជម្រើសតិចតួច។

អ្នកស្រី Florence Casimir ជាគ្រូបង្រៀននៅសាលាបឋមសិក្សាបាននិយាយថា ខណៈពេលដែលអន្តរាគមន៍អន្តរជាតិកន្លងមកបានធ្វើឲ្យប្រទេសហៃទីខូច ការរំលោភបំពានរបស់ពួកគេមិនប្រៀបធៀបទៅនឹងអំពើឃោរឃៅនៃក្រុមក្មេងទំនើង ដែលចាប់ពង្រត់សិស្សរបស់អ្នកស្រី និងបង្ខំឪពុកម្តាយឲ្យបង់ប្រាក់លោះយ៉ាងច្រើននោះទេ។

អ្នកស្រី Casimir បាននិយាយថា៖«វានឹងមិនប្រសើរ(ជាងអន្តរាគមន៍ពីមុន) ប៉ុន្តែប្រជាជនហៃទី មិនមានជម្រើសនៅចំណុចនេះទេ។ ប្រជាជនហៃទី មិនអាចប្រយុទ្ធប្រឆាំងវាដោយខ្លួនឯងបានទេ»។

បន្ទាប់ពីលោកនាយករដ្ឋមន្ត្រី អារៀល ហែនរី (Ariel Henry) បានជំរុញពិភពលោកក្នុងខែតុលា ឲ្យដាក់ពង្រាយកងកម្លាំងប្រដាប់អាវុធ ដើម្បីប្រយុទ្ធប្រឆាំងនឹងក្រុមក្មេងទំនើង អង្គការសហប្រជាជាតិ បានតស៊ូដើម្បីបញ្ចុះបញ្ចូលប្រទេសមួយឲ្យដឹកនាំកិច្ចខិតខំប្រឹងប្រែង ដើម្បីស្ដារសណ្តាប់ធ្នាប់នៅក្នុងប្រទេសការ៉ាអ៊ីបនេះ ដែលមួយផ្នែកដោយសារតែភាពចម្រូងចម្រាសកន្លងមកជុំវិញបេសកកម្មរក្សាសន្តិភាព។