​

អ្នកនាំពាក្យអង្គការសហប្រជាជាតិ បាននិយាយថា ជំនួយមនុស្សធម៌អង្គការសហប្រជាជាតិបានសម្រួលដល់ការដឹកជញ្ជូនជំនួយឆ្លងកាត់ព្រំដែនពីប្រទេសឆាត ចូលទៅក្នុងទីក្រុង Darfur ប្រទេសស៊ូដង់ ទោះបីជាជម្លោះនៅបន្តក៏ដោយ។

 លោក Farhan Haq អ្នកនាំពាក្យរងរបស់អគ្គលេខាធិការអង្គការសហប្រជាជាតិ បាននិយាយថា ការិយាល័យសម្រាប់ការសម្របសម្រួលកិច្ចការមនុស្សធម៌ បានប្រាប់យើងថា នៅថ្ងៃនេះការិយាល័យបានសម្របសម្រួលការដឹកជញ្ជូនមុខទំនិញស្បៀងអាហារឆ្លងកាត់ព្រំដែន ធ្វើឡើងដោយកម្មវិធីស្បៀងអាហរពិភពលោកពីប្រទេសឆាត ចូលទៅកាន់ទីក្រុង Darfur ភាគខាងលិច។

នៅប៉ុន្មានសប្តាហ៍ខាងមុខនេះ ទីភ្នាក់ងារអង្គការសហប្រជាជាតិ និងដៃគូសង្ឃឹមថានឹងផ្តល់ជំនួយបន្ថែម ជាពិសេសការផ្គត់ផ្គង់អាហារ អាហាររូបត្ថម សុខភាព ទឹក អនាម័យ និងគ្រឿងផ្គត់ផ្គង់អនាម័យ។

យោងតាមអ្នកនាំពាក្យបានឲ្យដឹងថា អគ្គលេខាធិការរងអង្គការសហប្រជាជាតិ ទទួលបន្ទុកកិច្ចការមនុស្សធម៌ លោក Martin Griffiths បាននិយាយថា ដំណើរការឆ្លងកាត់ព្រំដែនចូលទៅក្នុងទីក្រុង Darfur បង្ហាញពីព្រឹត្តិការណ៍សំខាន់មួយ ខណៈអង្គការសហប្រជាជាតិ ស្វែងរកដំណើរការចូលទៅដល់តំបន់ដែលពិបាកទៅដល់ទាំងអស់ នៅក្នុងប្រទេសស៊ូដង់ និងផ្តល់ជំនួយមនុស្សធម៌ចាំបាច់ទៅដល់ពលរដ្ឋដែលត្រូវការ នៅកន្លែងណាក៏ដោយដែលពួកគេរស់នៅ។

អ្នកនាំពាក្យ និយាយថា បេសកកម្មផ្តល់ជំនួយអន្តរការដែលបានដាក់បញ្ចូលរបស់អង្គការសហប្រជាជាតិ ក្នុងប្រទេសស៊ូដង់ កំពុងព្រួយបារម្ភយ៉ាងខ្លាំងអំពីផលប៉ះពាល់ធ្ងន់ធ្ងរពីការប្រយុទ្ធគ្នារវាង កងកម្លំាងគាំទ្ររហ័ស និងកងកម្លាំងប្រដាប់អាវុធស៊ូដង់ទៅលើជនស៊ីវិល នៅក្នុងទីក្រុង Darfur។